-Almmuhus-
-Almmuhus-
-Almmuhus-
OĐĐASATIlgadis dáhpáhus: Ealga fallehii beana­ráiddu

Ilgadis dáhpáhus: Ealga fallehii beana­ráiddu

-

-

Sotnabeaivvi eahkes vulggii beanavuoddji Jon Børge Stina hárjehallantuvrii, beanaráiddus ledje 12 beatnaga. Guokte golbma kilomehter ovdal go ollii ruoktot de fuomášii álddu ja miesi láhtu alde.

Son mearridii somás dihti filbmet meaddelvuodjima mii dábálaččat láve mannat hui bures, muhto mii dán háve manái hejot. 

– Bessen álddu ja miesi meaddel, manai bures, muhto de fáhkka jorggihii áldu ja fallehii ovtta nuppi beatnaga ráiddus. Ledjen hui balus, dadjá beanavuoddji Jon Børge Stina.

Okta beana roasmmehuvai nu garrasit ahte šattai goddit dan. Dáhpáhus dáhpáhuvai Luovttejogas Deanu gielddas.

Fallehii nuppes

Son muitala iežas huikán ja čergon, muhto ealga ii geassádan eret.

Dábálaččat láve Jon Børge Stinas mielde signálapeanna, muhto dán háve lei dat veahkeneavvu báhcán ruoktot. 

– In leat goassege oaidnán nu suhttan ealgga, dat fallehii juohke áidna beatnaga. Loahpas geassádii eret, muhto de čuožžilii ovddabeallai iige luoitán min meattá, dadjá son. Miessi lei maŋábealde ja áldu fas ovddabealde Jon Børge Stina.

– Geahččalin gavdnjet eret, muhto de fallehii fas. De easkka dovden iežan áitojuvvon, dieđusge ledjen veaháš balus. In duosttan nu olus bargat, geavahin dušše sániid dainna doaivagiin ahte geassáda áibbas eret láhttus, dadjá son. 

Beatnagat balus

Miessi loahpas vázzilii álddu guvlui, nu loahpas áldu maid geassádii láhttus eret ja Jon Børge Stina beasai dárkkistit beatnagiid. Okta beana lei nu garrasit roasmmehuvvan ahte šattai goddit dan.

– Bidjen roasmmehuvvan beatnaga rehkii ja vuoddjájin ruoktot. Vuhtten beatnagiin ahte ledje balus. Lean hui morrašis go massen ovtta beatnaga. Muđuid leat eará beatnagat buori vuoimmis. In leat gal suhttan elgii, mun bohten 12 gumppiin ja mii leat turisttat ealgga máilmmis. Vaikko dát ealgga lei issoras bahá, de in leat goassige vásihan ahte falleha mu ja beatnagiid, lohká son.

Váruha ealgga fas nuppes fallehit

Son árvvoštallá falleheapmi bisttii birrasii 5 minuhta ja ealga birrasii 30 minuhta cakkai sin ovdal go guđii luotta. 

– Balan diet ealga falleha fas nuppes, dadjá son. 

-Almmuhus-