-Almmuhus-
-Almmuhus-
OĐĐASATIL Ávju ja IL Nordlys šaddet oktan

IL Ávju ja IL Nordlys šaddet oktan

-

-

IL Ávju nieiddaid spáppačiekčanjoavku álggahuvvui 1991:s, muhto dál sii áigot oktiičaskit iežaset IL Nordlysain. 

Njukčamánus lei IL Ávjjus čoahkkin gos mearriduvvui ahte sii áigot oktiičaskit IL Nordlysain. Ávju stivrajođiheaddji, Espen Nystad, lohká sivvan leat go sis leat váttisvuođat oažžut eaktodáhtolaččaid, sihke hárjeheaddjiid ja stivramiellahtuid. 

– Mii oaidnit ahte unnit ja unnit olbmot gillejit bargat eaktodáhtolaš bargguid, ja jáhkán oktiičaskin Nordlysain sáhttá dahkat dan álkibun, dadjá Nystad. 

BUORRE: Ávjju stivrajođiheaddji Espen Nystad mielas lea buorre go galget oktiičaskot Nordlysain. Priváhta govva.
BUORRE: Ávjju stivrajođiheaddji Espen Nystad mielas lea buorre go galget oktiičaskot Nordlysain. Priváhta govva.

– Kárášjohka ii nu stuoris

Nystad muitala ahte su mielas lea buorre go galget časkojuvvot oktii, go mánát maid leat álgán jearrat manin Kárášjogas leat guokte spáppačiekčanjoavkku. 

– Kárášjohka ii leat nu stuoris ja galggašeimmet ovttasbargat vai mii šaddat oktan, dadjá Ávjju stivrajođiheaddji, Espen Nystad. 

Ovttaoaivilis

IL Nordlys stivrramiellahttu, Margrethe Sakshaug, lea ovttaoaivilis Ávjju stivrrajođiheaddjiin. Son lea positiiva oktiičaskimii ja muitala ahte unna báikkis, nu go Kárášjogas, lea ovdamunni čohkket resurssaid, nu go hárjeheaddjiid, váhnemiid ja eaktodáhtolaččaid. 

– Šaddet unnit eaktodáhtolaš barggut váhnemiidda, erenomážit váhnemiidda geain leat sihke nieida- ja gándamánát geat čikčet spáppa goappáge joavkkus, dadjá Sakshaug. 

OVTTAOAIVILIS: Nordlys stivramiellahttu Margrethe Sakshaug mielas lea buorre ahte galget oktiičaskot. Priváhta govva. 
OVTTAOAIVILIS: Nordlys stivramiellahttu Margrethe Sakshaug mielas lea buorre ahte galget oktiičaskot. Priváhta govva. 

Ovddidit nieiddaid

Son muitala ahte Finnmárkku Spábbačiekčanbiirres ja Norgga Spábbačiekčanlihtus lea prošeakta ovddidit nieiddaid spábbačiekčamis, masa son diehtá IL Ávjjus maid lea fokusa. 

– Odne mis lea okta nissonjoavku Nordlysas, nu ahte lea lunddolaš ovdáneapmi oažžut eará joavkkuid ovtta ja seamma searvái maid. Mun sávan ahte mii nagodat áimmahuššat ovdáneami sihke nieiddaid ja gánddaid spábbačiekčamis, loahpaha Sakshaug. 

-Almmuhus-