-Almmuhus-
-Almmuhus-
KULTUVRA Ijahis ija váldoartisttat

Ijahis ija váldoartisttat

-

-

Ijahis ija váldoartisttat leat Mari Boine ja ISÁK joavku.

Mari Boines lea jo guhkes ja erenomáš buorre karrieara ja ISÁK lea ges dálááiggi šearradeamos násti sámemusihkkasuorggis, čállá Ijahis idja preassadieđáhusas. 

 

Spellemann-vuoiti 

Mari Boine almmuhii iežas vuosttaš skearru jo 1985:s ja son almmustahttá ain ođđa musihka.

Ođđasamos skearru «See the woman» ilmmai ovddit jagi. 

Mari Boine lea maid bálkkašuvvon máŋgii.

Son lea earret eará ožžon Spellemann-bálkkašumi ja Davviriikkaid ráđi musihkkabálkkašumi.

Son čuojahii Ijahis ijas 2014:s.


Spellemann-vuoiti Mari Boine čuojaha Ijahis ijas. Govven: Audun Braastad/NTB scanpix

 

Bivnnut

ISÁK lea Ella Marie Hætta Isaksena musihkkajoavku.

Nuorra artista šattai dovddusin vuos Sámis go vuittii 2017 Sámi Grand Prixa, son vuittii seamma jagi maiddái Eurohpá minoritehtagielaid lávlungilvvu Liet International.

Son beaggigođii miehtá Norgga maŋŋel go vuittii NRK artisttaid gilvvu Stjernekamp. 

ISÁK musihkas ovttastuvvet árbevirolaš luohti, urbána syntetisáhtorat ja lyrihkat main lea sihke sáme- ja eaŋgalasgiella.

Joavku lea aiddo almmuhan vuosttaš álbuma «Ealán». Ovttas Ella Marie Hætta Isakseniin čuojaheaba musihkkajoavkkus Daniel Eriksen ja Aleksander Kostopoulos.  

Ijahis ija dievaslaš prográmma almmuhuvvo geassemánus. Festivála lágiduvvo Anáris, Suomas borgemánu 16. ja 17. beaivvi. 

- Advertisement -
-Almmuhus-