Ijahis idja festiválas fitne eanet galledeaddjit go mannan jagi ja čohkkii Anárii oktiibuot sullii 3300 festiválaguossi.
Ijahis idja festiválas fitne eanet galledeaddjit go mannan jagi ja čohkkii Anárii oktiibuot sullii 3300 festiválaguossi.
Golbmanuppelogát geardde lágiduvvon Ijahis ija, eamiálbmogiid musihkkafestivála, galledeaddjemearri lassánii mannan jagi ektui.
Goappáš eahkedat bivnnuhat
Dáhpáhusas ledje vuosttaš háve konsearttat olgolávddis sihke bearjadat- ja lávvardateahkeda.
– Goabbáge eahket lei hui bivnnut, vaikke lávvardaga leige veháš arvedálki. Dasa lassin Sajosa auditoria dáhpáhusat; teáhter bearjadaga ja skearroalmmustahttinkonsearttat lávvardaga, čohkkejedje sále dievva olbmuid, čállet sii preassadieđáhusastis.
Geahččit miehtá máilmmi
Maiddái mánáid- ja nuoraidbeaivvis ledje eanet oassálastit go ovdal. Ijahis ija olgokonsearttaid ja Yle Sápmi-arena lei vejolaš čuovvut neahttasáddagis.
– Lei vejolaš čuovvut Sámi oahpahusguovddáža medialinjjá lágidan neahttasáddaga bokte. Neahttasáddagat leatge šaddan eanet ja eanet bivnnuhin juohke jagi. Ijahis ija –livestream sáddagiid čuvvo badjel 3000 geahčči birra máilmmi, dieđiha festivála.
Ovttasbargu
Festiválas loaiddastedje dán jagi earret eará Sofia Jannok, Ylva, Ánnámáret Ensemble, Ulla Pirttijärvi & Ulda ja Felgen Orkester.
– Ijahis ija lágidit ovttasbarggus Anára Sámisearvi rs, Sámediggi, Sámi oahpahusguovddáš, Anára gielda, Dáidaga ovddidanguovddáža Lappi doaibmasadji, Sámemusea Siida, Yle Sápmi ja Hotealla Kultahovi, čállá festivála.
