-Almmuhus-
-Almmuhus-
OĐĐASAT Ijahis idja álgá odne

Ijahis idja álgá odne

-

-

Odne álgá eamiálbmogiid musihkkafestivála Ijahis Idja, ja lea ge viđanuppelogát geardde go festivála legiduvvo Anáris.

Prográmmas árbevirolaš ja modearna musihkka

Ijahis idja-festivála prográmma lea fas viiddis ja máŋggabealat.

Festiválaguossit besset návddašit sámemusihka olles viidodagas go lávddi ala gorgŋejit vahkuloahpa áigge Solju, Kevin Boine, Indigenous Bastards, Suõmmkar, Vildá, Tundra Electro, Ailu Valle, Amoc & Trio Boogiemen ja Felgen Orkester. Árbevirolaš vokálamusihka ovdanbuktet Nils-Heikki Paltto, Berit Alette Mienna, Ingá Elisá Påve Idivuoma, Anna Morottaja, Hildá Länsman ja Iŋgá-Máret Gaup-Juuso. Álgoálbmotguossi lea dán jagi kanadalaš DJ-kollektiiva A Tribe Called Red.

Joavku čuojaha dál vuosttaš geardde Suomas ja Ijahis ijas.

Boahttevuođa násttiid beassat oaidnit ja gullat bearjadaga beaivet Ijahis ija Násttážat-konsearttas, mas mánáid- ja nuoraid iežaset joavkkut besset lávddi ala.

Konsearttas čuojaha maiddái Solju ja konsertii lea nuvttá sisabeassan.

Musihka lassin prográmmas leat sápmelaš valáštallangilvvut, Yle Sápmi-arena ja musihkkaseminára Sámemusea Siiddas.

 

Festiválaguovllus duodjemárkanat ja eará bálvalusat

Ijahis ija festiválaguovllus leat máŋggalágan bálvalusat.

Duodjemárkaniin sámi duojárat vuvdet iežaset dujiid.

Doppe sáhttá oastit maiddái Ijahis idja t-báiddi. Festiválas lea borramuštealta ja kafea.

Báratealta fas lea rabas sihke bearjadaga ja lávvardaga dmu. 01.30 radjái.

Go maŋimuš konsearta nohka de báratealtas DJ fuolaha ahte feasta vel joatkašuvvá.

Sajosa restauráŋŋa Caiju lea rabas festivála áigge.

Festiválaguovlu ja bileahtavuovdin rahpasit bearjadaga dmu. 17.00 ja lávvardaga dmu. 14.00

 

Konsearttaid ja valáštallangilvvuid sáhttá čuovvut njuolggosáddagin Ijahis ija konsearttat ja valáštallangilvvut streamejuvvojit njuolggosáddagin neahttačujuhusas www.sogku.fi/live. Stream-sáddaga buvttadit ovttasbarggus Sámi oahpahusguovddáža medialinjá ja Yle Sápmi.

-Almmuhus-