Diibmá eai beassan norgalaččat ávvudit Norgga nationálabeaivvi nu go dábálaččat, ja dál ballá dearvvašvuođadirektevra ahte covid-19 gáržžida maiddái dán jagi miessemánu 17. beaivvi ávvudoaluid.
– Dássážii lean sávvan ahte beassat ávvudit miessemánu 17. beaivvi nu go dábálaččat, muhto go virus njoammu viidát ja ođđa virusvariánttat fuomášuvvojit, de lea oalle eahpesihkar mo ávvudeapmi šaddá, lohká dearvvašvuođadirektevra Bjørn Guldvog P4:š rádiokánalii.
Vaikke koronaboahkuheapmi lea álgán, de vurdojuvvo ahte šaddat eallit pandemiijan muhtin áiggi ovddas guvlui. Álbmotdearvvašvuohta árvvoštallá ahte norgalaččat eai beasa eallit nu go dábálaččat čuovvovaš jahkebeali dahje jagi.
– Jus boahkuheapmi ávkkuha sihke koronavirusa ja ođđa variánttaid vuostá, de eai dáidde šat dárbbašit nu olu gáržžidusat giđa beallái maŋŋel go leat boahkuhan olbmuid riskajoavkkus ja dearvvašvuođasuorggi bargiid, lohká Guldvog.
Diibmá gárte gáržžidit miessemánu 17. beaivvi ávvudoaluid ja buot ráidovázzimat šluhttejuvvojedje.
