Lávvordateahkeda lágiduvvui 20. MGPjr lávlungilvu, gos vuosttaš geardde gullui julevsámegiella gilvvus. William vuittii MGPjr 2022 gilvvu, lávlagiin «Tusen tanker».
Vaikko Ingebjørg ii beassan viidásat superfinálii iige vuoitán, de lei liikká buorre mokta.
MGP junioras besset golmmas viidáset superfinálii, ja dán jagáš superfinalisttat ledje Lisa ja Tobias (Frekhaugas eret), Elend ja Liam (Frekhaugas eret) ja William (Røykenis eret).
– Lea leamašan nu rámálmas vásáhus ja lean nu movtta William bealis. Vaikko in beassan superfinálii dahje vuoitán, de lean nu duhtavaš olles vásáhusain maid lean ožžon ja man olu lean olahan ná oanehis áiggis, dadjá Ingebjørg.
Ingebjørg muitala ahte lea ožžon buriid skihpáriid MGPjr mátkkis.
– Dás válddán viidáset buriid skihpáriid, ja lea somá go sáhttit čoahkkanit ná jođánit. Ferten fas dadjat ahte lean movtta William bealis, ja lean nu buorre buohkaide.
Ingebjørg Jakobsen (13) lávllui lávlaga «Her e æ», mii lea iežas birra, sihke gos orru ja maid liiko bargat astoáiggis. Son čevllohallá ruovttubáikkis dihtii ja danin háliidii ráhkadit lávlaga dan birra. Maŋimuš oassi lávlagis lea julevsámegillii.
– Lei somá lávlut julevsámegillii, ja orru leamen ahte olbmot liikojedje dasa. Lei hui fiinna vásáhus, dadjá Ingebjørg.
Vuoitis Williamas lei hoahppu mannat ávvudit, muhto muitala Ávvirii ahte lea leamašan somás vásáhus.
– Leamašan áibbas erenomáš, lean oahppan hui olu dás ja lea nu stuorra vásáhus, dadjá William.
Ávvir lea jearahallan Ingebjørg eatni ovdagihtii , ja son muitalii ahte ledje sullii čuođi olbmo geat vulge lulás čuovvut lávlungilvvu.
– Leat luohkkáolbmát, skuvlaolbmát ja bearaš geat vulget, ja mii nu illudit. Mii leat nu rápmásat Ingebjørgain, lohká Tonje Jakobsen.
Lávvordaga ledje sihke sii ja sámeleavga oidnosis dan botta go Ingebjørg lávllui.
