Mánnodaga go skuvllat rahpasit ohppiide 4. luohkás bajás, de leat skuvlabusset jođus ja vudjet nu go dábálaččat. Muhto korona njoammuneastadan njuolggadusaid geažil ii soaitte buohkaide sadji bussiin.
Vai skuvlamánát eai báze go busset leat dievva, de ávžžuha dál Romssa ja Finnmárkku fylkkasuohkan buohkaid geat sáhttet, ieža doalvut mánáid skuvlii ja garvit kollektiivajohtolaga.
– Mis leat kapasitehtahástalusat. Dat vearrámus mii dáhpáhuvvá lea jus skuvlamánát báhcet busses dan geažil go ii leat sadji. Mis lea gulahallan suohkaniiguin ja čuovvut ovdáneami dárkilit boahttevaš vahkku, dadjá johtolat fylkkaráđđi Kristina Hansen preassadieđáhusas.
Kapasitehtagárzzideapmi
Troms fylkestrafikkas ja Snelandias čuvvot nationála mearrádusaid ja njuolggadusaid ja ávžžuhit buot mátkkošteddjiid čuovvut kollektiivajohtolaga mátkkoštanráđiid. Buot bussiin lea unniduvvon kapasitehta, sihkkarastindihte mehtera gaskka buot mátkkošteddjiid gaskkas.
– Danne lea dehálaš dárkkuhit ahte vaikko skuvla lea nu go dábálaččat, de lea bussiin unnit kapasitehta go dábálaččat, dadjá Hansen.
