Nordlánda ja Romsa eai šatta oktasaš regiovdnan, dan leat fylkkaráđit mearridan. Dattetge áigot eambbo ovttasbargagoahtit.
– Romsa ja Nordlánda leat oalle ovttalágan fylkkat, mis leat ovttalágan bálvalusat, nu go oahppu, johtalus ja ealáhusovdáneapmi. Mii ovttasbargat máŋgga ládje, muhto oaidnit ahte sáhttit vel eambbo ovttasbargat, lohká Romssa fylkkaráđi jođiheaddji Cecilie Myrseth (Bargiidbellodat) preassadieđáhusas.
Rádji bissu
Goappaš fylkkaid fylkkaráđit leat ovttaoaivilis ahte Davvi-Norgii lea buoremus ahte rájit bissot nu go dál leat. Sii leat doallan guokte čoahkkima gos fylkkaráđit leat beassan digaštallat ášši.
– Romssa ja Nordlándda rádji bissu nu go lea. Mii áigut geahččat movt sáhttit formálalaččat álggahit ovttasbarggu ovdánahttit ealáhusovdáneami Ofuohta-guovllus. Fylkkaide livčče maid ávkin jus ovttasbarggašeimmet johtalusas, oahpahusas, kultuvrras ja ealáhusovdánahttiimis, lohká Nordlándda fylkkaráđi jođiheaddji Tomas Norvoll (Bargiidbellodat).
Gievrrat iehčanassii
Goappaš fylkkaráđiid jođiheaddjit lohkaba ahte fylkkat leat doarvái gievrrat iehčanassii. Maiddái dain áššiin mat gullet stuora servodatbargguide.
– Fylkkat leat gievrrat ja nannosat goabbat ládje. Maiddái de jus stáhta lasiha barggu regiovnnain. Jus regiovnnat áiggi mielde ožžot nu stuora bargodoaimmaid, ahte fertešii oktasaš Hålogalánddaregiovdna, de sáhttit fas álgit ságastallat. Dál gal orru nu ahte ráđđehusa regiovdnareforbma ii heive gosage olles riikkas, lohká Myrseth.
Davvi-Norgga ráđđi
Fylkkaráđiid jođiheaddjit oaivvildeaba ahte Davvi-Norgga ráđđi šaddá vel deháleabbon boahtteáiggis, go fylkkat bissot nu go leat.
– Mii áigut dál nannet dan ovttasbargoforuma. Lea hui ávkkálaš go lea forum gos sáhttá ovttasbargat dakko gokko sáhttá, lohká Norvoll.
– Ovttasbargu sáhttá šaddat vel buorebun. Davvi-Norgga ráđđi sáhttá hoahpuhit ovttasbarggu, ja doppe lea maid Finnmárku mielde, lohká Myrseth.
Olbmuid lahka
Skuvlahámádat ja johtalusbálvalusat leat stuorámus bálvalusat mat fylkkain leat. Romssa ja Nordlándda fylkkat áigot viidásit ovdánahttit fálaldagaid.
– Romsa ja Nordlánda leat stuora fylkkat. Mii fertet fállat bálvalusaid doppe gos olbmot orrot. Dat galget buorit bálvalusat. Dasa lassin áigut geahččat skuvlahámádaga mii lea rádjeguovllus, ja movt mii dan sáhttit buoridit, loahpaha fylkkaráđi jođiheaddji Cecilie Myrseth.
