– Mii vuosttaldat ahte Mineráladirektoráhtta dohkkeha doaibmalobi Nussir-ruvkii, dadjá sámediggeráđđi Inger Eline Eriksen Fjellgren preassadieđáhusas.
– Mii vuosttaldat ahte Mineráladirektoráhtta dohkkeha doaibmalobi Nussir-ruvkii, dadjá sámediggeráđđi Inger Eline Eriksen Fjellgren preassadieđáhusas.
Sámediggeráđđi Inger Eline Eriksen Fjellgren muitala ahte sii vuosttaldit ahte Mineráladirektoráhtta dohkkeha doaibmalobi Nussir-ruvkii ja lasiha ahte son lea sihkar ahte ii šatta Nussir-ruvkkes mihkkege nu guhká go sus lea dadjamuš áššis.
Čujuhit minerálaláhkii ja olmmošvuoigatvuođaláhkii
Mineráladirektoráhtta sáddii geassemánu 21. beaivvi gulaskuddamii Nussir ASA ohcama oažžut doaibmalobi Riehpovuona veaikeruvkii. Gulaskuddanáigemearri lei čakčamánu 1. beaivvi.
Sámediggi lea cealkámušastis Direktoráhttii čujuhan ahte minerálalága ja olmmošvuoigatvuođalága mielde galgá mearkkašahtti láhkai deattuhit sámi kultuvrra sin árvvoštallamiin.
Sámediggi oaivvilda ahte dakkár stuorra sisabahkken gáibida ahte Sámediggi ja orohagat ovdagihtii mieđihit sorjjasmeahttumit.
– Doaibmalohpi lea nu stuorra vahágin guolásteapmái ja boazodollui, ahte dat hehtte dan guovllu sámi ealáhusaid. Prošeakta ii leat gánnáhahtti servvodatekonomalaččat, ii leat orohat, ii ge Sámediggi konsultašuvnna vuođul mieđihan doaimmaide ovdagihtii. Daid sivaid geažil ii sáhte doaibmalohpi addot, dadjá sámediggeráđđi Fjellgren.
– Ii šatta Nussir-ruvki nu guhká go mus lea dadjamuš áššis
Minerálalága vuođul sáhttá biehttalit addimis doaibmalobi sámi beroštumiid geažil. Go Sámediggi dahje FeFo vuosttaldit doaibmalobi, de galgá departemeanta mearridit ášši.
Sámediggi lea gulaskuddancealkámušas albma láhkái árvvoštallan dan riektevuođu man mielde doaibmabiju galgá meannudit, ja makkár váikkuhusat das leat sámi kultuvrii ja servodahkii, birrasii, guolásteapmái ja boazodollui.
– Go direktoráhtta dál ferte sáddet ášši departementii mearrideapmái, de vuorddán ahte departemeanta dahká vuđolaš álbmotrievttálaš árvvoštallamiid doaibmabijus. Mii áigut váruhit ahte sii leat gozuid alde dán áššis. Sii galget minguin konsulteret albma láhkai jus sii oaivvildit ahte dás sáhttá addit lobi. Lean sihkar ahte ii šatta Nussir-ruvkkes mihkkege nu guhká go mus leaš dadjamuš áššis, loahpaha sámediggeráđđi Inger Eline Eriksen Fjellgren preassadieđáhusas.
