Dán jagi ii sáddejuvvo Sámi Grand Prix neahta iige rádio bokte. Maŋemuš guokte jagi lea Guovdageainnu Lagasradio (GLR) sádden šovva radio bokte, muhto dál lea ovttasbargu bissehuvvon. Sámi Musihkkafestivála ja GLR bealis dovddahit heajos gulahallama maid sivvan.
Dán jagi ii sáddejuvvo Sámi Grand Prix neahta iige rádio bokte. Maŋemuš guokte jagi lea Guovdageainnu Lagasradio (GLR) sádden šovva radio bokte, muhto dál lea ovttasbargu bissehuvvon. Sámi Musihkkafestivála ja GLR bealis dovddahit heajos gulahallama maid sivvan.
Sámi Grand Prix lágiduvvo juohke beassášlávvordaga Guovdageainnus, ja dán jagi šaddá 27. háve go lágiduvvo. Olbmot miehtá Sámi leat beassan gullat ođđa lávlagiid ja luđiid rádio ja neahta bokte. Dán jagi eai beasa eará go sii geat leat Guovdageainnus oaidnit Sámi Grand Prix. Sámi Musihkkafestivála lea dál mearridan ahte sii eai sádde Sámi Grand Prix neahta, eai ge rádio bokte. Vars čilge ahte sii eai hálit sáddet neahta bokte danne go das lea kvalitehta vuos nu heittot.
– Ii leat olmmošriekti beassat geahččat Sámi Grand Prix, ja nu guhká go mii eat nagot buori neahttasáddaga sáddet, de ii leat riekta ahte sáddet sáddaga mii ii leat nu buorre, dadjá Sámi Musihkkafestivála buvttadeaddji Nils Johan Vars
– Stivrras leat mearridan ahte eat sádde neahta bokte, go jietna lea nu heittot. Olbmot gehččet neahttasáddaga ja doivot ahte lea dat dássi mii lea Sámi Grand Prixas, vaikko duohtavuođas lea buorre kvalitehta. Easka go dasa nagodit ráhkadit buoret kvalitehta, de sáhttit fas árvvoštallat sáddet neahta bokte.
SMF áigo ieža sáddet
Guovdageainnu Lagasradio sáddii Sámi Grand Prixa diibmá ja ovddit jagi radio bokte. Dán jagi sii eai sádde šat, ja Guovdageainnu Lagasradio doaimmaheaddji Nils Martin Kristensen čilge dan ná:
– Mii leat sádden Sámi Grand Prix guokte jagi, muhto maŋŋel diimmá beassážiid mii oaččuimet dieđu Sámi Musihkkafestivála stivrras ahte sii ieža dán barggu barget dás rájes. Sii áigo ieža váldit ovddasvástádusa sáddet njuolggosáddaga Sámi Grand Prixas, ja áigo ieža ohcat ruđa dasa. Dasto sii áigo láigohit min bargat dan barggu, muhto mii eat sáhttán dasa miehtat, go mii áigut iešheanalaččat bargat dan. Mun árvalin ahte sii ráhkadit festivála nu go sii máhttet, ja mii ráhkadit njuolggosáddaga nu go mii máhttit. Dan rájes in gullan šat maide.
Beare maŋŋit dál jearrat
Kristensen lohká sin Guovdageainnu Lagasradio bealis leamaš gearggusin olles dálvvi, muhto sii eai gullan maide Sámi Musihkkafestiválas. Su mielas ii leat buorre go ná šaddá.
– Go mun dál dán vahkku ožžon jearaldaga Sámi Musihkkafestiválas sáddet Sámi Grand Prix rádio bokte, de fertejin hilgut. Dál lea dušše golbma vahkku beassážiidda, ja dat lea beare unnán áigi ráhkkanit. Njuolggosáddagii ferte ráhkkanišgoahtit unnimusat golbma mánu ovdal.
– Lea hui ahkit go Sámi Grand Prix ii sáddejuvvo. Dán áiggi mii leat hárjánan beassat čuovvut diekkár stuora doaluid neahta bokte, muhto dál fáhkka eat beasa. Lea hui suivat, orrut dego mannan maŋosguvlui áiggis, dadjá GLR redaktevra.
Eai leat ožžon mávssu
Sámi musihkkafestivála buvttadeaddji vástida ahte sii njuolgut eai leat sáhttán ovttasbargat Guovdageainnu Lagasradioin, danne go gulahallan ii leat buorre.
— Mii eat leat ožžon mávssu diimmá sáddaga ovddas. GLR sáddii Sámi Grand Prix ja ovttasbarge NRK Sámiin Inga Juuso muitokonsearttain, eai ge sii leat máksán dan maid galge. Danne šattai váttisin midjiide ovttasbargat singuin.
NRK áidna geainna sáhtášedje ovttasbargat
Vars mielas ii leat buorre go ná šaddá, go Sámi Grand Prix han galggašii gullot miehtá Sámi.
– Lea balahahtti ahte šaddá báikkálaš gilvun, muhto dál mii fertet rohttet vuoiŋŋahaga ja ođđasit geahččalit. Mihttun mis lea oažžut albma tv-sáddaga, mas lea buorre govva ja jietna. Rádio lea maid okta vejolašvuohta, muhto dál ii soaitte boahtit rádioi ge. Mun áiggošin obbalaš šiehtadusa muhtumiin, ja in oainne eará ovttasbargoguoimmi go NRK. Sis lea vejolašvuohta ja sii leat ovdal filbmen Sámi Grand Prix. Mis ii leat dán jagi leamaš gulahallan singuin, muhto maŋit áiggi lea dat mii ferte boahtit sadjái. Mii fertet guhkit gulahallama oažžut, gos mis lea seamma ipmárdus.
