Norgga beale Sámediggi gidde doarjjaortnetportála skábmamánu 23. beaivvi rájes ja rahpasa fas boahtte jagi.
Sámedikkis muitalit ahte sivvan dasa lea go eanaš doarjjaortnegiid bušeahtat leat nohkan, danne lea sámediggeráđđi mearridan giddet vejolašvuođa ohcat doarjagiid.
– Sámedikki iešguđetlágan doarjjaortnegiidda leat 2022:s leamaš olu ohccit. Maŋŋel pandemiija oaidnit ahte dál lea šaddan olu aktiviteahta sámi servodagain, ja mii leat váikkuhan ruđalaččat olu buriid doaimmaide. Dat lea dagahan ahte eanas bušeahtat doarjjaortnegiidda leat nohkan. Danne mii fertiimet giddet vejolašvuođa sáddet ođđa ohcamiid, dadjá sámediggeráđđi Runar Myrnes Balto preassadieđus.
Sámedikki doarjjaportála giddejuvvo ođđa ohcamiidda skábmamánu 23. b. 2022 ja lea gitta olggos dán jagi. Ohcamat mat leat boahtán ovdal dán beaivvi meannuduvvojit dađistaga. 2023 ortnegiidda lea fas vejolaš ohcat ođđajagemánu 9. b. rájes.
– Mii áigut meannudit ohcamiid mat leat boahtán sisa, muhto olu ohcanvuđot ortnegiin fertet biehttalit olu buriid ohcamiid dainna sivain ahte bušeahtta lea nohkan, lohka Balto loahpalaččat.
