Dearvvašvuođaeisseválddit leat mudden njamahanrávvaga ja rávvejit individuálalaččat heivehallat.
Dearvvašvuođaeisseválddit leat mudden njamahanrávvaga ja rávvejit individuálalaččat heivehallat.
Rávvagat leat dán rádjái leamaš ahte njuoratmáná berre dušše njamahit guđa vuosttaš mánu. Gaskavahkku bođii ođđa ávžžuhus go dearvvašvuođaeisseválddit leat geahčadan unnamánážiid biebmanrávvagiid.
Mudden biebmanrávvaga
Nu go ovdal, de rávvejuvvo dál ain ahte unnamánážat berrejit oažžut dušše čižžemielkki ja D-vitamiidnalasáhusa vuosttaš jahkebeali. Muhto dál lea lassiráva ahte ferte heivehallat iešguđet máná dárbbuid mielde.
– Jus mánás lea dárbu eanet biepmu oažžut go dušše čižžemielkki maŋŋel go lea njealjemánnosaš, de sáhttá biepmu fállat mánnái, dieđiha Dearvvašvuođadirektoráhtta.
Eai buorit dahje heajos
Eai leat duođaštuvvon ovdamunit biebmat máná dábálaš biepmuin ovdal go lea guđamánnosaš ja go mánná stuorru nu go galgá ja liiko njamaheapmái, lohká divišuvdnajođiheaddji Linda Granlund.
– Dearvvašvuođadirektoráhtta lea 2001 rájes ávžžuhan ahte unnamánážat berrejit oažžut dušše čižžemielkki guđa vuosttaš mánu. Ođđa dutkan čájeha ahte ii leat ágga rievdadit dán ávžžuhusa, go geahččá allergiijaid ja atopalaš buozalmasvuođa ja biepmuid gierdameahttunvuođa ektui, lohká son.
Dan dihte eai leat heajos beliid ge gávdnan jus álggaha biepmu addit mánnái lassin čižžemielkái go lea gaskal njealje- ja guđamánnosaš, dieđiha Eurohpálaš biebmooadjebasvuođaorgána masa ođđa rávvagat dál čujuhit.
Lea Máilmmi dearvvašvuođaorganisašuvdna Eurohpás mii buktá rávvagiid maid Norggas dál čuovvolit. Eará davviriikkat maid čuvvot dán rávvaga. (©NTB)
