-Almmuhus-
OĐĐASAT– Ii rievdda min dáfus mihkke­ge jus vel Áltá manná ge Romsii

– Ii rievdda min dáfus mihkke­ge jus vel Áltá manná ge Romsii

-

-

Guovdageainnu sátnejođiheaddji lohká unnán jáhkehahttin ahte Áltá háliida Romsii. –Jáhkán Áltá jurdila guovtte, jus ii golmma háve, ovdal go ohcet Romssa fylkii. 

Miessemánu logát beaivvi jienasta Álttá álbmot áigot go ohcat gullevašvuođa Romssa fylkii, dan oktavuođas go Romssa ja Finnmárku stuorafylka galgá fas juhkkot guovtte sadjái. 

Ránnjásuohkanis Guovdageainnus ii leat sátnejođiheaddji nu balus jus vel Áltá šattaš eará fylkii go sii. 

– In leat nu balus dien dáfus gal, go lea ášši mii ii leat jođus mange ládje. Vaikko sii áigot čađahit álbmotjienasteami galget go ohcat beassat Romssa fylkii, de signálat ráđđehusas čájehit ahte sii eai beasa dohko. Ii leat nu ahte suohkan sáhttá ieš válljet gullevašvuođa, ja fáhkka ohcat ovdamearkka dihte Oslo fylkii. Dat ii doaimma nu min máilbmi, dadjá sátnejođiheaddji Hans Isak Olsen (Dáloniid listu).

–Unnán dieđut

Olsen lea ovttaoaivilis politihkkáriiguin Álttás geat leat lohket leat beare unnán dieđuid ožžon váikkuhusaid birra ovdal álbmotjienasteami ja obanassiige dán áššis. 

– Dat eai leat čielggaduvvon dehálaš bealit, ovdamearkkadihte movt šaddá Álttáin Finnmárkolága dáfus. Ja lea einnostuvvon ahte Áltá massá beali sin dálá Davvi-Norgga doarjagis, birrasiid 90 miljovnna ruvnno juohke jagi. Dat ii dagašii buori Álttá ekonomiijai. Leat bealit mat eai leat dárkkistuvvon ráđđehusa bealis, ja mun in dieđe man olu resurssaid galgá bidjat diekkár einnosteapmái go lea nu eahpečielggas visot. Áltá boahtá bissut gos lea,13 miilla mis eret. Min dáfus ii rievdda das mihkkege jus sii besset Romssa fylkii, dadjá Olsen. 

Son ii jáhke váikkuhit boazodollui ge jus Áltá gullá Romsii, go dál leat juo ollu orohagat mat johtet geasseorohagaide Romsii ja dat manná bures. 

Jus Áltá manná, ferte veardidit

Olsen ii loga Guovdageainnu oažžut Álttás makkárge ávkki dál ruđalaččat, ja sin dilli ii rievdda. Muhto jus geavvá nu ahte Áltá loahpas oažžu gullevašvuođa Romsii, de lea lunddolaš Guovdageidnui geahčadit dan vejolašvuođa. 

–Jus lea nie ahte mii massit beali Davvi-Norgga doarjagiin, de eat dán ilmmis ge dohko oza. Muhto dan beaivvi go geavvá nu ahte Áltá oažžu dan dieđu ahte sii ožžot rievdadit fylkagullevašvuođa, de fertet mii nai veardidit dien guvlui, sihke ovdamuniid ja maid mii manahit, dadjá Olsen ja lohká iežas jáhkkit ahte visot diet bealit čielggaduvvot jus álbmotjienasteamis doarju eanetlohku gullat Romsii, dadjá Olsen. 

-Almmuhus-