Ráđđehus dieđiha ahte luonddumáŋggabealatvuođa dihtii ii rievdat ráđđehus gonagasreappá gávppálaš guolásteami geográfalaš rájá.
– Gonagasreabbá lea buktojuvvon ealli mii váikkuha mearrabodnái. Viiddidit eriin muddejuvvon gonagasreabbáguovllu sáhttá buktit stuorra váikkuhusaid luonddumáŋggabealatvuhtii. Dat sáhttá mielddisbuktit stuorra riskka ekovuogádahkii man birra mis ii leat doarvái diehtu, eatge sáhte árvvoštallat daid váikkuhusaid, lohká guolástus- ja mearrabiebmoministtar Odd Emil Ingebrigtsen ráđđehusa preassadieđáhusas.
Mearradutkaninstituhta gonagasreabbádutkan čájeha ahte gonagasreabbá sáhttá jávkadit eará elliidšlájaid dahje rievdadit mođđebotni ekovuogádaga. Dál lea gonagasreabbáhálddašeapmi guovtti oasis. Nuortabealde 26 gráda, Davvinjárgga gieldda gaskkamuttus, hálddašuvvo gonagasreabbá riggodahkan mii buktá bargosajiid ja gánnáhahtti ealáhusdoaimmaid. Dás muddejuvvo sálaš eriid bokte. Oarjjabealde rájá besset buohkat bivdit gonagasreappá eastadan dihtii dan viidásat leavvama.
– Dálá hálddašeami bokte ollašuhttit mii Norgga álbmotrievttálaš geatnegasvuođaid go ráddjet amas elliidšlájaid leavvama, seammás go doalahat gánnáhahtti ealáhusa, lohká guolástus- ja mearrabiebmoministtar Odd Emil Ingebrigtsen.
