Politiijat leat heaittihan ášši syrialaš dievddu vuostá gii bođii Norgii ovttas 14 jahkásaš áhpehis nieiddažiin.
Politiijat leat heaittihan ášši syrialaš dievddu vuostá gii bođii Norgii ovttas 14 jahkásaš áhpehis nieiddažiin.
Áhpehis 14-jahkásaš nieiddaš Syrias eret, geas ovdalaččas lei jo okta mánná, bođii Norgii Ruošša bokte juovlamánu 2015. Su mielde lei su 23-jahkásaš isit, juoga mii bovttii ollu fuomášumi.
Dakkár oktavuohta Norggas lea ráŋggáštahtti ášši, ja ášši šattai dutkojuvvot.
Ášši heaittihuvvon
Finnmárkku politiijaguovllu áššáskuhtti, Morten Daae duođašta ABC Nyheterii ahte ášši lea heaittihuvvon.
– Vuođđun árvvoštallamis lea ahte áššit leat dáhpáhuvvan eará báikkis. Formálalaččat lea ášši heaittihuvvon go lei nu movt lei, čilge Daae ABC Nyheterii.
Earálágan kultuvra eará riikkain
Son deattuha ahte lea leamaš váttis ášši.
– Norgga lágaid mielde lea gielddusin dat mii lei dáhpáhuvvan. Muhto galggaimet go dubmet syrialaš riikkaássi dagu ovddas mii lea dohkkehuvvon Syrias? Dat leat iešguđetlágan kultuvrrat oarjeriikkain eará riikkaid ektui, lohká Daae.
Dievdu lea čilgen politiijaide ahte Syrias ožžot nieiddat náitalit go leat ožžon mánnodávdda. (©NTB)
