-Almmuhus-
OĐĐASATIi ožžon Sámedikki miehtat juolludit ruđa goaskinvaháteastadeapmái

Ii ožžon Sámedikki miehtat juolludit ruđa goaskinvaháteastadeapmái

-

-

Sámedikki rievdaduvvon bušeahta meannudeami oktavuođas lei NSR, ÅsG ja JL, ovddidan evttohusa juolludit 400 000 ruvnno goaskinvaháteastadandoaimmaide. Eanetlohku sámedikkis jienastedje vuostá.

– Dat lea dehálaš ahte mii sámedikkis čájehit ahte mis lea dáhttu, ja danin livččii dehálaš leamaš juobe juoidá ge dáhttut dahkat go lea ná duođalaš dilli boazodoalus, lohká áššejođiheaddji, Mathis Nilsen Eira.

 

Guorahallat

Eira lohká ahte 400 000 ruvdnu ii čoavdde maidege vahágiid, muhto lei čájehit ahte sámedikkis lea dáhttu oažžut johtui eastadandoaimmaid, ii ge dušše hoigat ovddasvástádusa stáhtalaš eiseválddiide.

– Diehttelasat lea ain boraspirevahágat stáhta ovddasvástádus, muhto lea heahtedilli ja mii fertet de reageret, lohká son.

 

Dárkkistit heahtepáragráfa

Jus boranávdi falleha nu go bohcco, de galgá leat lohpi boazodoallis báhčit návddi.

Diet paragráfa ii leat liikká nu čielggas.

– Mii leimmet beassat atnet oasi dan 400 000 ruvnnus diesa mahkáš. Leimmet maid beassat bálkáhit bivdiid geat bivdet boraspiriid, vai lea sihkkareabbo ahte báhččojit dan mađe návddit go leat mearriduvvon, lohká Eira.

 

Loga maid: Eai beasa báhčit

 

– Diehtán šat masa galggai

Sámedikki presideanta, Vibeke Larsen, ii loga iežas doarjut dien evttohusa máid Eira ovddidii bušeahtta meannudeami oktavuođas.

– In mun lean šat sihkar masa dat ruhta galggai adnot, ja eai hal orron šat eai ieža ge diehtime sihkkarit masa galggai dat ruhta adnot. Dat ii leat maid Sámedikki ovddasvástádus boranávdehálddašeapmi. Danin in mun goit sáhte doarjut dan, lohká son.

 

Loga maid: Dáid geažil lea Stuorradiggi mearridan unnidit goaskinvahágiid

 

Stáhta ovddasvástádus

Bargiidbellodaga sámediggeáirras, Marit Kirsten Anti Gaup, lohká ahte dat ii leat Sámedikki ovddasvástádus hálddašit boraspiriid.

– Mii oahpahit vel stáhta dasa ahte sámediggi váldá ovddasvástádusa ja ruhtada, nu eat sáhte mii bargat, ja danin eat ge dorjon dan evttohusa, lohká Anti Gaup.

 

– Beaivváš Sámi Našunálateáhter ii leat maid Sámedikki ovddasvástádus, muhto dohko gal lehpet mielas juolludan ruđa ovdaprošektii. Manin de ii leat šat dat stáhta ovddasvástádus dušše, ii ge Sámediggi galgga dohko juolludit ruđa?

– Beaivvážis gal lea dušše ovdaprošeakta, ja dat lea dušše oktii. Boraspirevahágat eai oba noga ge, dat leat juohke jagi, vástidii Anti Gaup.

-Almmuhus-