-Almmuhus-
-Almmuhus-
OĐĐASAT Ii ožžon báhčinlobi

Ii ožžon báhčinlobi

-

-

Orohat 22 boazodoalli Nils Mathis M. Sara ii ožžon báhčinlobi báhčit guovžža mii lea speadjan Šuoššjávrri lulábealde. Oktiibuot son lohká massán logenár miesi dan maŋemus áiggi.

Stáda Luonddubearráigeahčču lei dán vahkku ovttas boazodolliin báikkis gos duođaštedje ahte doppe lea guovža oaguhan ealu ja borran misiid.

Boazodoalli lohká oaidnán oktiibuot guhtta guovžža, vaikko juste dál ii leat go dát okta guovža mii oaguha áldoealu.

 

Ohce báhčinlobi

Raporta sáddejuvvui Birasdirektoráhttii ja maiddái ohcamuš oažžut báhčinlobi guvžii.

Stáhta Luonddubearráigeahču boraspireovddasvástideaddji Finnmárkkus, Magne Asheim ii lohkan iežas jáhkkit veadjemeahttumin oažžut báhcinlobi guvžii.

 

Loga maid: Guovža speadjan lahka Šuoššjávrri

 

Eai leat gávdnan ráppiid

Birasdirektoráhta seniorráđđeaddi Susanne Hanssen duođašta ahte báhčinlohpi ii leat addon.

– Boazodoalli lea ožžon dieđu ahte báhčinlohpi ii leat addon. Sivvan dasa lea ahte eat leat gávdnan ráppiid maid guovža galgá goddán. Sii leat dasa lassin dal johttán davásguvlui ja eret dán guovllus. mii lea hálddašanguovlu guovžžaide, lohká Hanssen.

 

Sáhttet ođđasit ohcat

Birasdirektoráhta bealis lohket ahte sis lea vejolašvuohta ođđa ohcamuša sáddet sidjiide.

– Sii sáhttet ođđa ohcamuša sáddet jus háliidit. Go mii oažžut báhčinlobi ohcamuša, de álo dahkat individuála ja konkrehta mearrádusa áššis. Mii árvvoštallat lea go vejolaš bidjat johtui eará eastadandoaimma, lea go guovžža hálddašanguovllus ja makkár vahágiid guovža lea dahkan, čilge Hanssen.

 

Ovdal juo vuojehan eret

Nils Mathis M. Sara lohká iežas jáhkkit ahte guovža čuvoda ealu.

– Lean oktii ovdal juo vuojehan eret ealus, mu mielas hal gal orru čuvodeame ealu.

 

- Advertisement -
-Almmuhus-