Koronaođas Norggas:
Vuosttaš geardde njukčamánu 10. beaivvi rájes ii leat oktage pasieantta buohcceviesuin vuoigŋanmašiinna divššus covid-19 geažil, Dearvvašvuođadirektoráhta dieđuid mielde.
Vuossárgga čájehuvvo ahte leat guhtta pasieantta geat leat čálihuvvon Norgga buohcceviesuide covid-19 dihte, muhto ii oktage leat vuoigŋanmašiinna divššus. Dát lea lassáneapmi guvttiin pasieanttain bearjadaga rájes.
Buot guđas leat čálihuvvon dearvvašvuođaregiovnnas Helse sør-øst. Guovttis leaba Ahus buohcceviesus, okta lea Vestre Vikenis, okta Sørlandet buohcceviesus, okta Østfoldas ja okta lea priváhta buohcceviesus mas lea šiehtadus dearvvašvuođaregiovnnain.
Oktiibuot leat Norggas 8981 olbmo geain lea duođaštuvvon koronavirus, ja 253 olbmo leat jápmán koronavirusa dihte.
