-Almmuhus-
OĐĐASAT– Ii makkárge dáhkádus ahte CWD ii njoamo Sápmái

– Ii makkárge dáhkádus ahte CWD ii njoamo Sápmái

-

-

Eanandoalloministtar lea ávžžuhan jávkadit Nordfjella goddeealu vai CWD-dávda ii njoamo viidásit. NBR jođiheaddji illuda go viimmat biddjojit doaimmat johtui, muhto ii leat vel oadjebas ahte dávda ii njoamo Sápmái.

Eanandoallominsttar lea ávžžuhan Biebmobearráigeahču jávkadit Nordfjella gottiid, vai CWD-dávda ii leava.

Dieđalávdegoddi (VKM) lea ráhkadan raportta dávdda birra, raporta ovdanbuktojuvvui gaskavahkku.

Raporttas leat čielga rávvagat mii berre dahkkot viidásit, daid rávvagiid váldá ministtar vuhtii.

– Raporta addá čielga rávvagiid makkár doaimmat berrejit biddjot johtui. Dát rávvagat leat seamma maid Biebmobearráigeahčču ja eará fágabargit leat rávven. Lea dehálaš čuovvolit sin rávvagiid johtilit. Danne lean ávžžuhan Biebmobearráigeahču jávkadit gottiid Nordfjellas, lohká eanandoallo- ja biebmoministtar Jon Georg Dale preassadieđáhusastis.

 

– Ii makkárge dáhkádus ahte ii njoamo Sápmái

Nordfjella lea goddeguovlu Buskeruda, Hordalándda ja Sogn ja Fjordane fylkkain. Das leat boazosearvvit lahka.


NBR jođiheaddji Ellinor Marita Jåma. Vuorkágovva: Nils Johan Vars

Norgga Boazosápmelaččaid Riikkasearvvi (NBR) jođiheaddji Ellinor Marita Jåma lea ilus go doaimmat biddjojit johtui.

NBR lei mannan vahkku čoahkkimis, gos ministtar, Biebmobearráigeahčču ja dutkit ledje.

NBR čielga diehtu lea ahte gottiid ferte jávkadit, vai hehtte njoammuma, NBR lea maid gáibidan áiddi goddeealuid ja bohccuid gaskii, vai dávda ii beasa leavvat.

– Jus dát njoamušii bohccuide, de livčče ovttatmanos šaddan njuovvat daid, nu ahte livčče hirbmat stuora váikkuhusat sámi boazodollui, lohká Jåma.

Su mielas lea dehálaš eambbo dieđuid háhkat dávdda birra, go lea vuos beare unnán diehtu.

– Mis ii leat makkárge dáhkádus ahte ii njoamo, muhto lea dehálaš doaimmaid bidjat johtui, vai leat bargan maid sáhttit eastadit njoammuma, lohká NBR jođiheaddji.

 

– Eiseválddit beare hilljánat

Inge Even Danielsen lea NBR bealis čuvvon dán ášši dan rájes go beakkehii ahte dávda lea gávdnon Norggas.

Son lea NBR stivralahttu.

– NBR lea leamaš gozuid alde dán áššis, ja ohcalan doaimmaid. Dás lea sáhka našunála heahtedilis. Mii leat ovttaoaivilis rávvagiiguin maid VKM raporta ovdanbuktá, ja leat geahččalan ovddidit daid. Dál leat hui duhtavaččat go proseassa mannagoahtá njuovžileappot. Departemeantta bealis leat leamaš beare hilljánat dán áššis, lohká Danielsen.

 

Šattašii jávkadit ealuid ja vuordit 5-6 jagi

Dál lea vuosttaš háve go dávda gávdno eará sajis go Amerihkás ja Mátta-Koreas.

USA dutkit gávnnahedje ahte dávda vuos njoammu eallis eallái, muhto dađi mielde šattuide maid.

Dutkit gávnnahedje ahte dávda de sáhttá bissut guovllus vaikko vihtta jagi.

– Jus Sápmái njoammu dát, de šattašii jávkadit ealuid, ja diktit guovlluid orrut 5-6


NBR stivraláhttu Inge Even Danielsen. Vuorkágovva: Inga Marie Guttorm
 

jagi ovdal go beasašii fas johtit dohko, čilge Danielsen.

 

Danielsen sávvá ahte dávda lea árrat fuomášuvvon, go muđui son jáhkká dan ii sáhte jávkadit.

– Jus mis lea hui lihkku, de leat Norggas fuomášan dán dávdda árrat. Dušše de lea doaivva jávkadit dávdda. Eat mii dieđe lea go ávki jávkadit Nordfjella goddeealu, muhto eat mii sáhte vuordit dassá go oažžut eambbo dieđuid dávdda birra. Lea oba issoras jus dávda njoammu vuovderuoigguide ja sarvvaide, go dat leat eallit mat mátkkoštit stuora guovlluin. De mis sáhttá bistit dát váttisvuohta agibeaivvi, lohká Inge Even Danielsen.

 

Ii njoamo olbmuide

CWD-dávda njoammu sarvvaelliide, ja billista ealli nearvafierpmi. Ealli jápmá dávddain.

Dávda gávdnui vuosttaš háve Norggas cuoŋománus diibmá, Nordfjella gottiin. Dutkit gávdne Selbus ealggaid main lei dat dávda, 300 kilomehtera eret Nordfjellas.

Eai leat dieđut mat čujuhit ahte dávda sáhttá viessoelliide dahje olbmuide njoammut, vaikko borrá bierggu. Dávda njoammu sarvvaeallis sarvvaeallái.

Go eanet ja eanet elliide njoammu dávda, de nuoskkiduvvo biras maid, gos dat eallit leat. Dasto álgá dávda nu maid njoammut.

VKM raporttas čuožžu ahte beaktilis doaibma eastadit njoammuma, lea jávkadit buot gottiid Nordfjellas. Dasto ferte sihkkarastit ahte guvlui eai mana sarvvaeallit viđa jahkái. Dat lea doaibma man raporttas čuoččuhit buoremus doaibman dálá dillái.

Doaibma ferte ođđasit guorahallojuvvot jus dávda gávdno eará guovlluin maid.

-Almmuhus-