-Almmuhus-
-Almmuhus-
-Almmuhus-
KULTUVRAIi loga stuorrát rievdadit festivála

Ii loga stuorrát rievdadit festivála

-

-

Sámi Musihkkafestivála (SMF) ođđa buvttadeaddji Ol Johan Gaup illuda álgit ođđa ámmáhii, muhto ii loga gal stuorra rievdadusaid vuordimis.

– Lea hui somá oažžut dán luohttámuša ja šaddá hui somá álgit bargat maid. Buvttadanjoavkkus leat čeahpes olbmot, geat leat guhká bargan Sámi Musihkkafestivála ovddas ja go SMF nagoda lágidit buriid doaluid de lea hui olu dáid čehpes olbmuid geažil, lohká aitto virgáduvvon buvttadeaddji Ol Johan Gaup.

 

– Veahá hárjáneapmi

Gaup lea leamaš Sámi Musihkkafestivála stivrras maŋimus golbma jagi, son lea maid ovdal bargan veahá smávit lágidemiin duoppil dáppil Sámis.

Son lea maid golbma jagi lágidan Riddu Riđu nuoraidprográmma, ja 2007:s lei mielde lágideamen Gávnnadeapmi-konferánssa, mii lei stuorra konferánsa sámenuoraid várás.

– Diet lágideamit leat smávva lágideamit, ja diekko bokte addet veahá hárjáneami, lohká Gaup.

Dál váldá ge badjelasas SMF buvttadeaddjiámmáha, ja dán dáidá sáhttit gohčodit sámi stuorámus festiválan, mas leat olu doalut olles beassášvahkku muhto maiddái muđuid jagis.

Gaup lohká leat nu aitto virgáduvvon ahte ii leat šiehtadus ge vuolláičállon, muhto lohká leat ságas ahte galgá leat buvttadeaddjin 2017 giđasgeassái.

 

Stuorit rievdadusaid váldit dađi mielde

Gaup ii loga alddis gal leat jurdagiid stuorrát rievdadit SMF prográmma.

– Stivrras lea leamaš sáhka rievdadit hámi, dál leat vuođđudushámis. Dan nuppástuhttima leat hupman dahkat maŋŋil go leat geargan boahtte beassáš lágidemiiguin. Dán jagi šaddet dušše smávit rievdadusat nu mo lávejit ge jagis jahkái, čilge son.

Buvttadeaddji muitala stivrras leamaš sáhka rievdat vuođđudus hámis oasusfitnodathápmái.

– Ođđa hámis de sáhttá geahččat gávdnat ođđa luottaid, muhto mii eat leat bidjamin dasa návccaid gal ovdal go leat lágidan 2017 beassášdoaluid, muitala son.

 

Áigu čalmmustahttit sámi artisttaid

Go Ávvir jearrá sus ahte mo olbmot bohtet vuohttit ahte SMF:s lea ođđa buvttadeaddji, de lohká dasa leat váttisin vástidit dál vuos.

– Mii fertet geahčadit makkár bušeahta bidjat, mihttu ainjuo lea báhcit dietnasiin iige vuolláibáhcagiin.

Prográmma dáfus lohká iežas háliidit čalmmustahttit sámi artisttaid.

– Dán rádjai 2016:s leat jo birrasiid 15 artistta almmuhan ođđa almmuhusaid, ja beassážiid rádjai bohtet sullii čieža vel. Livččii hui somá addit sidjiide vejolašvuođa čuojahit beassážiid, ja geahččalit gávdnat dakkár artisttaid geat áiggošedje almmuhit ođđa musihka beassážiid áigge, nu ahte almmuhankonseartta beasašedje čuojahit min lávddis, lohká son ja deattuha ahte prográmma dattege ii leat mearriduvvon.

 

Prográmma árabut

Duos dás ain lávejit buollát digaštallamat das ahte SMF beassášprográmma almmuhuvvo maŋŋit muhtimiid mielas.

– Mis livččii mihttu almmuhit prográmma áiggil, skábman. Dat lea dehálaš vai olbmot besset plánet, jurddašisgoahtit beassážiid birra ja illudit. Vaikke diehttelasat Guovdageainnus leat olu olbmot beassážiid áigge, de lea liikká buorre almmuhit prográmma árrat, lohká Gaup.

Son lohká maid alddis leat miella ahte SMF váldá badjelasas dan koordináhtor-rolla man lohká olbmuid váillahan.

– Dat mearkkaša ahte sáhttit gulahallat eará lágideddjiiguin maid, čalmmustahttit sin doaluid ja váruhit ahte eat šatta nuppiid ovdii. Dat ii leat gal dássážii ge leamaš mu mielas váttisvuohta, Guovdageainnus lávejit leat máŋggat doalut seamma eahkeda beassážiid áigge, ja dat lea doaibman, lohká son.

 

Giitevaš

Sámi Musihkkafestivála stivrrajođiheaddji muitala alddiineaset leamaš moadde molssaeavttu geaid leat árvvoštallan go virgádedje ođđa buvttadeaddji ja loahpas válljejedje de Ol Johan Gaup.

– Mii jearaimet sus, ja go lei veaháš smiehtastan de válddii vuostá virggi ja mii leat hui giitevaččat dan ovddas.

Sara Eira maid namuha ahte Gaup lea leamaš mielde smávit lágidemiin ovdal ja SMF stivrras čohkkán máŋga jagi.

– Nu ahte buvttadanbargu ii leat aibbas amas sutnje, lohká stivrrajođiheaddji.

 

 

 

 

-Almmuhus-