-Almmuhus-
-Almmuhus-
-Almmuhus-
OĐĐASAT– Ii livčče leamaš ávki vaikke leimmet gávdnat vajot go ohcagođiimet

– Ii livčče leamaš ávki vaikke leimmet gávdnat vajot go ohcagođiimet

-

-

Álgojándora ohce politiijat boasttu guovllus dan 46-jahkásaš boazodoalli guhte sotnabeaivvi dieđihuvvui jávkan ja vuossárgga gávdnui duššan.

46-jahkásaš guovdageaidnulaš boazodoalli dieđihuvvui jávkan sotnabeaivvi. Dalle lei jávkosis leamaš vihtta jándora. Vuossárgga gávdnui son duššan, oalle guhkkin eret dan guovllus gos álggos ohce.

Ráissa leansmánnekantuvrra bálvá Dag Rune Stangeland jođihii ohcanbargguid.

Son muitala ahte albmá oapmahaččat eai hálit duššan olbmo nama almmuhuvvot medias.

 

 Jándora ohce boasttu guovllus

Politiijat bidje sotnabeaivvi johtui ohcanakšuvnna, mas ohce sihke helikopteriiguin ja skohteriiguin.

– Mis lei dušše okta teoriija álggos, man vuođul barggaimet, namalassii ahte almmái galgá leat skohteriin vuoddján Birtavári guovllus Guovdageidnui. Mii ozaimet dan guovllus sihke sotnabeaivvi ja vuossárgga. Go lei gollan veahá áigi de oaččuimet indikašuvnnaid ahte dát teoriija ii doala deaivása, earret eará go eat lean maidege gávdnan.

Sihke Seaking helikopter ja suodjalusa helikopterat ohce girddi. Eatnan alde ozai Guovdageainnu Rukses Ruossa, logiin olbmuin. Sii galge atnit jávrriid ja jogaid guovddážis ohcamis.

– Vuossárgga de mearrideimmet viiddidit ohcanguovllu maiddái eará guovlluide. Das maŋŋil de lei muhtin bearašlahttu jápmán albmás guhte gávnnai su, muitala Stangeland.

 

Gahččan 15-20 mehtera

Almmái gávdnui Moskolatvákkis, oalle guhkkin eret Guolášjávrris gos álggos ohcagohte. Stangeland ieš lohká ahte dat mearkkaša ahte sii diehttelasat ohce boasttu guovllus álgojándora.

– Almmái lea vuodján gorsii, ja gahččan birrasii 15-20 mehtera. Go gávdnui, de lei leamaš jo jápmán muhtin áigge, in duostta árvvoštallat man guhká. Earret eará danne sáddet ge liikka rumašrahpamii, muitala Stangeland ja joatká:

– Muhto lea goit nu ahte vaikke livččiimet gávdnan albmá vaikke diimmu maŋŋil go ohcagođiimet, de das ii livčče leamaš ávki.

Son muitala ahte albmás ja su bearrašis ledje bohccot dan guovllus gos gávdnui:

– Jáhkkimis lea leamaš boazobarggus go dieppe lei.

 

Sáddejuvvo rumašrahpamii

Stangeland árvvoštallá gahččama leat jápminsivvan.

– Dan dattetge eat dieđe sihkkarit. Lea dábálaš sáddet jápmán olbmuid rumašrahpamii go dákkár dilis gávdnojit, go leat unnán vihttanat ja unnán diehtu su lihkastemiid birra maŋimuš jándoriid. Mii dutkat ášši čielga lihkohisvuohtan, ja árvvoštallat geargat iežamet bargguin dán vahkkus. Jápminbáikki leat jo dutkan, muitala Stangeland.

Son muitala maid politiijaid ja ohcanveaga vásihan ahte lei geamádat ja ahte lei ruovdecuoŋu.

– Min skohteriid maŋis eai báhcán luottat ge go vujiimet, ja boazodoallit leat muitalan nie leamaš ainjuo vahkku. Jáhkkimis lea geamádat ja dat siivu dagahan ahte almmái ii leat fuomášan gorssa go vujii dasa, čilge son.

 

Giitá ohcanveagaid

Ohcanakšuvdnii serve Rukses Ruossa, suodjalus, SeaKing helikopter ja priváhta olbmot, lassin politiijaide. Stangeland giitá ja rámida buohkaid geat serve ja geat luike iežaset rusttegiid dán akšuvdnii.

– Dán áššis gárttai morašlaš boađus, muhto visot dan morraša siste de leat goitge ilus go almmái gávdnui. Dat lea geahpádussan iešalddis, sáhttá leat oalle noađđin oapmahaččaide vuordit ja vuordit, ja jurddašit mii son lea geavvan. Danne leat giitevaččat veahki ovddas, lohká son.

-Almmuhus-