Vaikke lea gasku válgagičču, de biehttala Guovdageainnu Dáloniidlistu iežaset lágideame válgga geažil álbmotčoahkkima odne. Jođiheaddji muitala sin addit buohkaide sátnesaji, vel eará bellodagaide maid.
Odne eahkes, diibmu 17:30, lágida Guovdageainnu Dáloniidlistu álbmotčoahkkima LES-viesus Guovdageainnus. Álbmotčoahkkimis galget váldot ovdan áššit mat gusket juste Guovdageainnu ássiide, go Dáloniidlisttu áiggošii ahte Guovdageainnu suohkan galggašii hálddašit visot mii guoská suohkanrájiid siskkobeallai.
Guovdageainnu Dáloniidlisttu jođiheaddji, Isak Mathis O. Hætta, biehttala dán álbmotčoahkkima leat oassin válgagiččus, muhto dušše heivii juste dán áigodagas doallat dan.
– Mii han addit sáni saji buohkaide čoahkkimis, ja mis alddiineamet ii leat sátnevuorru obanassii ge, muitala son.
FeFo ii guldal álbmoga
Hætta muitala ahte jurdda lea čuožžilan dan dihte go sin Dáloniidlisttu mielas ii FeFo guldal suohkana ássiid maid oaivvildit.
– Buorre ovdamearka lea ealgabivdoearit dán čakčii. FeFo ii doahttalan min áigumušaid, eai ge Kárášjoga áigumušaid ge, vaikke leat mii geat galgat eriid mearridit suohkana siskkobeale. FeFo dušše dagai mearrádusa min meaddel, lohká son.
Iešmearrideapmi
Hætta muitala iežas dovdat bures movt lea hálddašit iežas suohkana buriid.
– Mii Guovdageainnus leat ovdal leamašan friddjasuohkana geahččalanortnegis mielde, ja mii diehtit movt lea ieš mearridit movt hálddaša. Mis doaimmai hui bures dalle dat ortnet, muitala son.
Dalle beasai ge Guovdageainnu suohkan mearridit ieš ealgabivdui bivdoeriid, rievssateriid, skohtermáđijaid, guollebivddu ja nu ain.
– Álbmot háliidivčče earret eará ahte olgoriikaássit galget ráddjejuvvot eret duottarjávrebivddus, muhto FeFo čiehkáda EEO-šiehtadusa duohkai ja čuoččuha ahte ii leat lohpi mearrádusaid dahkat gos EEO ássit eai beasa šat ávkkástallat seamma ládje nu go jávrriid, go suohkana ássit. Dat ii leat riekta, dan dihte go Finnmárkoláhka addá ge juste dan vejolašvuođa, čilge son.
Dovdá buoremusat
Son gii dovdá friddjasuohkana geahččalanortnega, mii lei 90-jahkelogus, buot buoremusat lea Gurutbellodaga Anton Dahl. Son lei ge sátnejođiheaddji daid jagiid go lei Guovdageainnus dat geahččalanortnet.
– Livččii niehku dan fas beassat vásihit. Dalle mii hálddašeimmet ieža buot suohkana resurssaid. Mii maŋideimmet rievssatbivddu čakčamánu 10. beaivái, loddema geahččalanortnet bođii daid jagiid johtui, mii suovaimet geassemánus maid vánddardit mehciid, go mii diđiimet gos lea jierpmálaš vánddardit. Mun doarjjun dien jurdaga ollislaččat, ja Gurutbellodat lea ge prográmmii maid bidjan dien áigumuša, muitala Dahl, ja lasiha vel:
– Muhto eahpitkeahttá válgagižžu Dáloniidlisttus, dan eai dárbbat gal šiitit.
