Son lea moaitán Kárášjoga dearvvašvuođaguovddáža go vásihii heajos bálvaleami telefuvnna bokte. Dearvvašvuođahoavda lohká vuhtiiváldit cuiggodemiid.
Son lea moaitán Kárášjoga dearvvašvuođaguovddáža go vásihii heajos bálvaleami telefuvnna bokte. Dearvvašvuođahoavda lohká vuhtiiváldit cuiggodemiid.
– Ii leat somá go vástidit telefuvnna fuoikumin, dadjá okta guhte lea sádden moaitaga Kárášjoga gildii. Son cuiggoda gieldda Dearvvašvuođaguovddážis leamaš heajos bálvaleami go son riŋgii njukčamánus.
– Orui erdon
Almmái sáddii moaitaga gildii loahpageahčen njukčamánu, das muitala mo dearvvašvuođaguovddážis vuostáiváldimis vástidedje sutnje go riŋgii njukčamánus. Son ii hálit namas muitalit áviisii, muhto miehtá muitalit maid vásihii.
– Mun riŋgejin diibmu 12.20 ja son guhte vástidii šuohkihii ja orui veaháš erdon. Olmmoš čilgii ahte rahpanáigi lea 12.45 rájes, muitala almmái.
– Ii leat miella ođđasit riŋget
Su mielas dát ii leat buorre bálvaleapmi.
– De ii leat olbmos šat miella riŋget ruovttoluotta jearrat smávvaáššážiid mat dattege sáhttet leat dehálačča olbmo dearvvašvuhtii, dadjá almmái ja lohká iežas erenoamážit smiehttat dakkáriid birra geat illá háliidit riŋget doaktáriidda.
– Jus nie vástiduvvo sidjiide maid de eai soaitte šat riŋget. Olbmuide ii galggašii nie vástidit. Danne mun sáddejin moaitaga go dovddan ahte lea geatnegasvuohta čalmmustahttit dákkáriid.
Árvala mo sáhttá buoridit
Iežas moaitagis lea almmái árvalan mo dearvvašvuođaguovddáš sáhtašii buoridit bálvaleami telefun bokte. Son čállá:
«Jus guovddážis ležžet rahpanáiggit de berre:
1. Dán birra dieđihuvvot gieldda ruovttusiidduin
2. Háhkat automáhtalaš telefonvástideaddji
3. Diktit telefuvnna čuodjat iige vástidit dan ovdal rahpanáigge, de eai sirdde heajos dearvvašvuođaguovddáža heajos miellalági geavaheddjiide»
– Bargit leat sihkkarit dolkan go olbmot riŋgejit dalle go eai galggašii, muhto veaháš service gal ferte liikká, dadjá almmái guhte ii loga gal ovdal iige maŋŋil vásihan dákkáriid Kárášjoga Dearvvašvuođaguovddáža bealis.
Čuovvolit cuiggodemiid
Kárášjoga gieldda Dearvvašvuođa- ja fuollaossodaga hoavda Randi Johansen Paltto lohká dáid leat buriid árvalusaid.
– Go bohtet cuiggodeamit de dieđusge čuovvolat daid. Dákkár áššit mannet njuolgga gielddadoaktárii guhte suokkarda mii lea dáhpáhuvvan ja mo sáhttá buoridit. Dearvvašvuođaguovddáža vuostáiváldin gullá maid doavtterbálvalusaid vuollái, čilge Johansen Paltto.
Vuorkágovva
Ođđa telefunguovddáža háhkamin
Dearvvašvuođa hoavda muitala gieldda buorideamen dáid bálvalusaid.
– Telefunbálvalusa teknihkkalaš beliin leat guhká leamaš duhtameahttumat, dat ii leat čiegus ášši, danne leat ge dál háhkamin ođđa telefonguovddáža, čilge Johansen Paltto ja joatká:
– Muhto bálvaleapmi ii leat dušše teknihka duohken ja dien dáfus fertet buot bargit rahčat dainna ahte čađat atnit muittus buriid vuostáiváldin dábiid.
Ođđa appa
Dasa lassin muitala Johansen Paltto ahte gielda lea buorideamen ruovttusiidduideaset, muhto ii loga diehtit guhkás dainna bargguin leat ollen.
– Muhto mis lea maid ođđa applikašuvdna mainna geavaheaddjit ieža sáhttet telefuvnna bokte dahkat diibmovárremiid. Nu eai soaitte nu olus šat dárbbašit riŋget guovddážii diŋgot diimmu ja de ožžot sii geat fertejit hállat beassat guovddážiin, jođáneappot vástádusa, čilge son.
