Dál ii galgga šat johtolatdivada máksit njuolga stáhtii. Ođđajagi rájes galgá johtolatdáhkádusdivada máksit dáhkádusfitnodagaide.
Dál ii galgga šat johtolatdivada máksit njuolga stáhtii. Ođđajagi rájes galgá johtolatdáhkádusdivada máksit dáhkádusfitnodagaide.
Fievrruid jahkedivada máksin rievdá 2018 rájes, ja mákso ovttas fievrodáhkádusain.
– Dat dahká ahte sáhttá juohkit divada máŋgga sadjái, mii álkida biilaeaiggádiidda, lohká NAF gulahallanhoavda Inger Elisabeth Sagedal preassadieđáhusas.
Ii dárbbaš máksit jus bisseha dáhkádusa
2017 lea maŋemuš háve go jahkedivat galgá máksot. Ođđajagemánu 1. beaivvi rájes 2018:s galget dáhkádusfitnodagat gáibidit johtolatdáhkádusdivada stáhta ovddas.
– Ođđa divat čuovvu biilla dáhkádusa. Johtolatdáhkádusdivat mákso dušše dalle go fievru lea dáhkiduvvon. Dalle ii dárbbaš biilaeaiggát máksit divada jus biillas váldá eret šilttaid, dahje jus bisseha dáhkádusa. Ovdamearkka dihte jus ii geavat biilla dálvet, lohká Sagedal.
Váldit eret šilttaid
Jus váldá eret šilttaid, de ferte daid doalvut Geaidnodoaimmahahkii, ja doppe orrot guhtta mánu, ovdal go fas sáhttá viežžat daid. Dat ii mávsse go 140 ruvnno. Sáhttá maid bivdit vurkkodit šilttaid guhkit.
Dáhkádusdivat, man dál mávssát, bistá dassá go fas ođastat dáhkádusšiehtadusa.
Sáhttá juohkit
Jus mávssát dáhkádusa mánnosaččat, de dáhkádusfitnodat automáhtalaččat juohká dan ođđa divada maid 12 oassái. Jus mávssát dáhkádusa okte jagis, de mávssát ođđa divada maid dušše okte jagis.
Sáhttá maid juohkit 12 máksimii, dasto sáhttá son gii háliida, garvit ovtta stuora máksima, nu go dál lea.
