-Almmuhus-
OĐĐASAT– Ii leat sadji eará go oarjemáilmmi dutkanmáhttui

– Ii leat sadji eará go oarjemáilmmi dutkanmáhttui

-

-

Boazodoalu árbevirolaš ekologalaš máhttu ja hálddašanvuogit unnán váldojit mielde iešguđetge stivrenproseassaide mat váikkuhit boazoealáhussii, čájeha ođđa doavttirgrádadutkan.

PhD kandidáhtta Ellen Inga Turi bealuštii odne iežas doavttirgráda «Stáhta stivren ja árbevirolaš ekologalaš máhttu boazodoallohálddašeamis» Ubmi universitehtas, Ruoŧas.

Vásttosteaddji lei professor Dietrich Soyez geografi instituttas Kølna Universitehtas, Duiskas.

 

Viiddis guorahallan

Dutkos lea guorahallan sámi boazodoalu Oarje-Finnmárkkus, Davvi Norggas, ja nenetsa boazodoallu Jamalnjárggas, Oarje-Sibiras. Dát leat stuorámus boazodoalloguovllut máilmmis, sihke olbmuid ja ealuid dáfus.

– Dain guovlluin leat ovttaláganvuođat, muhto maid nuppe dáfus stuora erohusat, nugo erohusat politihkalaš organiseremis ja stivrenvuogádagain, čállá Turi preassadieđáhusastis.

 

Árbevirolaš máhttu ii atno vuođđun

Ellen Inga Turi bohtosat čájehit ahte váikko eiseválddit iežaset gulaskuddanproseassain dávjá váldet fárrui boazodoalu iežas organiserenovttadagaid, nugo siidda, de aŋkke eai ane boazodoalu árbevirolaš máhtu vuođđun mearrádusaide dahje stivrejupmái.

– Čilgehussan dasa lea go stivrenprinsihpat leat formaliserejuvvon dainna lágiin ahte ii leat sadji eará máhttovuogádagaide go oarjemáilmmi dutkanmáhttui, iige leat sadji eará organiserenvugiide go hierárkkalaš dahje eanetlogu stivremii, čilge Turi.

 

Dárbbašuvvo strategiija

Boazodoalloealáhusa hálddašeapmái dárbbašuvvo ollislaš strategiija dasa movt árbevirolaš máhtu galgá oažžut vuođđun stivrenproseassaide, oaivvilda dutki.

– Danne go ii leat doarvái dušše atnit mielhálddašeami ja dábálaš gulaskuddanproseassaid, čilge son.

 

Dutkkus lea oassin IPY EALÁT dutkanprošeavttas. Sámi Allaskuvla ja UArctic EALÁT Instituhtta Riikkaidgaskasaš boazodoalloguovddážis Guovdageainnus leaba koordineren dán prošeavtta. Seastinbáŋkku 1 Davvi- Norgga dutkanfoanda, Boazodoalu ovdánahttinfoanda, davviriikkaid ministerráđđi ja Norgga dutkanráđđi leat ruhtadan dán barggu.

-Almmuhus-