Sydvaranger ruvkefitnodagas ii leat šat ruhta biraslaččat čorget ruvkedoaimma maŋis.
Sydvaranger ruvkefitnodagas ii leat šat ruhta biraslaččat čorget ruvkedoaimma maŋis.
Nuoskkiduvvon ruvkebáikkit ja oljoruivvit báhcet čorgekeahttá Sydvaranger Gruve fitnodaga doaimma maŋis. Konkursabáhcu lea dieđihan Birasdepartementii ahte sii eai leat nuoskkidanlága vuođul geatnegahtton čorget ruvkke, nu go Birasdepartementta gáibida.
– Biraslaš ja servodatlaš beroštumit bohtet maŋimussan ja ruhtagáibideddjiid gáibádusat bohtet ovdalii, muitala báhcohálddašeaddji Leif Petter Madsen Dagen Næringslivii.
Stuora vealggit
Badjelaš čuođi ruhtagáibideaddji leat dieđihan velggiid 3,5 miljárdda ruvnno ovddas konkursabáhcui. 400 bargi masse bargguid go Sydvaranger ruvke reastaluvai.
Gáibidit čorget
Birasdepartemeanta lea gáibidan golbma miljovnna ruvnno ovddas čorget nu ahte lea biraslaččat stánddas ja nu ahte ii leat nuoskkidanvárra.
Báhcohálddašeaddji Leif Petter Madsen dieđiha reivves direktoráhttii ahte báhcohálddašeaddji ii sáhte lohpidit ahte dolvot várálaš mirkkuid rievttes báikái ja eará gáibádusaid maid lága bokte gáibidit, danne go lea unnán ruhta konkursabázus.
Báhcohálddašeaddji Madsen lohká ahte sii čorgejit golgan oljjuid ja kemikálaid, muhto jus bohtet ođđa eaiggádat, de fertejit sii čorget nuoskkideami ruvkeeatnamis.
Ollu čorgemuš
Divraseamos čorgenoasi ii oro báhcohálddašeaddji áigume máksit, ja loahpalaš vuoruheapmi gáibádusaid ovddas biddjo báhcohálddašeaddjis ovdan Čáhcesullo diggegoddái loahpas dán mánu.
Maŋemus mánu leat 20 olbmo bargan sihkkarastit árvvuid ja ráhkkanahttit ruvkke vuovdin ládje. Ruvkkes barget 12 olbmo geat čorgejit, basset ja logahallet biergasiid main lea árvu.
