Nuohttačeahppi lea gávnnahan ahte «Skomáhkár Ánde» luohti mainna Johan Anders Bær vuittii Sámi Grand Prixa, ii leat plagiáhta.
– Nugo ledjen vuordán, lohká juoigi.
– Árbevirolaš juoigan ja luohti lea oalát massán árvvu, lohká ges luohtedáhkki.
Johan Anders Bær vuittii dán jagá Sámi Grand Prix (SGP) luohteoasi «Skomáhkár Ánde» luđiin. Maŋŋil gilvvuid oaččui Sámi Musihkkafestivála (SMF) váidaga Karen Anne Anti Kildedamas ja Anne Kirsten Holmestrand Hansenis, soai oaivvildeigga Bæra plagieren luođi maid soai leaba bidjan Arne Hansenii ja juoigan skerrui 2013:s.
Nu šattai SMF váldit nuohttačeahppi Anders Somby veahkkin analyseret ja buohtastahttit luđiid gávnnahan dihte lea go vuoitoluohti plagiáhta.
– Eai leat plagiahtat
Sámi Musihkkafestivála stivrajođiheaddji Ellen J. Sara Eira dieđiha dál preassadieđáhusas ahte sii dál leat ožžon vástádusa konsuleanttas Anders Sombys Sámi Grand Prix 2015 vuoitoluođi váidaga ektui. Oanehaččat daddjon de son oaivvilda ahte luođit eai leat plagiahtat. Anders Somby čállá ná:
«Oanehaččat daddjon, de eai leat luođit obbalaččat mu oaivila mielde plagiahtat. Lea dušše okta unna temáš (okta njealji temás) mat sulastahttet».
Álgojury cealkán dan seamma
Sámi Grand Prix juoiganoasi álgojury lea maid cealkán ahte luohti maid Johan Anders Bær juoiggai Sámi Grand Prix:as 2015, ii leat Arne Hansena luohti.
Eai váldde vuhtii váidaga
Sámi Musihkkafestivála konklušuvdna áššis lea dasto čuovvovaš:
Skomáhkár Ánde luohti, mainna Johan Anders Bær searvvai ja vuittii Sámi Grand Prix 2015, ii leat Arne Hansena luohti. Váidda Sámi Grand Prix 2015 vuoitoluođi ektui, ii dasto váldo vuhtii. Johan Anders duođaštuvvo leahkit juoiganoasi vuoitin.
Sámi Musihkkafestivála bealis leat geargan áššiin, čállá stivrajođiheaddji Ellen J. Sara Eira vel preassadieđáhusas.
– Nugo ledjen vuordán
– Dát gal lei nu go mun juo ledjen vuordán, ja maid mun lean čađa áigge diehtán ja čuoččuhan: Skomáhkár Ánde luohti ii leat plagiáhta, lohká juoigi Johan Anders Bær.
– Mun in dárbbaš suoládit luđiid, ja buot vearrámus dán áššis leage go mu leat vikkahan suolan, lohká Bær ja geažuha ahte son ii soaitte geargan dáinna áššiin vaikko nuohttačeahppi dál lea ge dorjon dan maid son lea čađaáigge čuoččuhan.
– Luohti massán árvvu
Karen Anne Anti Kildedam ja Anne Kirsten Holmestrand Hansen dat leaba ráhkadan Arne Hansen luođi ja soai leabe ge maid váidán ahte Bær juoiggai sudno ráhkaduvvon luođi Sámi Grand Prix juoigangilvvus. Nubbi luohtedahkki, Anne Kirsten Holmestrand Hansen lea aittobáliid ožžon dieđu SMFs maid nuohttačeahppi Anders Somby cealká luđiid birra, iige leat vel ollen lohkat olles Somby čilgehusa.
– Mu vuosttaš jurdda lea ahte dál lea árbevirolaš juoigan ja luohti oalát massán árvvu. Jus dan sáhttet čuoččuhit ahte dat luohti maid Johan Anders Bær juoiggai Sámi Grand Prixs ii leat seamma luohti go Arne Hansen luohti, de gal ožžot boahtteáiggis ráhkadit ovtta ja seamma luođis máŋgalogi eará luođi, lohká Holmestrand Hansen.
– Imaš go nuohttačeahppi geavahit
– Ferten maid lohkat ahte mu mielas lea hui imaš go SMF vállje nuohttačeahpi bidjat árvvoštallat dán guokte luođi. Manne geavahit dáčča málle árvvoštallat luđiid. Ii sápmelaš leat goassege nuohtaid mielde juoigan dahje geahččan luođi. Dál orrut oalát guođđán iežamet juoiganárbevieru, iige oro luođis šat obanassiige árvu. Dál ii dárbbaš šat nama ge bidjat luohtái. Odne sáhtán juoigat ovtta luođi ja gohčodit dan iežan eatni luohtin, ihttin fas sáhtán rohttehit seamma luođi ja gohčodit dan ges iežan oappá luohtin, lohká Holmestrand Hansen.
Anne Kirsten Holmestrand Hansen ii leat vel ollen hupman nuppiin luohtedáhkkiin, Karen Anna Anti Kildedamain nuohttačeahpi árvvoštallama birra.
– In dieđe vel maid dál dahke, dohkkehetne go dán, vai manne go viidáseappot áššiin, lohká Holmestrand Hansen vel.
– Luđiid gal sáhttá nuohtaid mielde árvvoštallat
Čuoččuhussii ahte luđiid ii sáhte nuohtaid mielde árvvoštallat, vástida juoigi Johan Anders Bær ná:
– Dál lea nuohttačeahppi árvvoštallan luđiid ja lea beare tullja čuoččuhit ahte luđiid ii sáhte nuohtaid mielde árvvoštallat, buot luđiide mat mu skearruin leat, leat ráhkaduvvon nuohtat. Dien čuoččuhusa ahte ii sáhte nuohtaid mielde árvvoštallat luđiid gal in eisege doarjjo.
