-Almmuhus-
-Almmuhus-
OĐĐASATIi leat ovttaoaivilis Näkkäläjärviin

Ii leat ovttaoaivilis Näkkäläjärviin

Neahttaredaktevra

-

-

Klemetti Näkkäläjärvi ii loga doarjut šat ILO-169 ratifiserema, várreságadoallis gal lea eará oaidnu.

 – Mun dieđán ahte Näkkäläjärvi ii gal doarjjo ILO-169 ratifiserema maŋŋil go riikkabeaivvit hilgo ođđa sámediggeláhkaevttohasa. Muhto mun gal ain doarjjun ratifiserema, dadjá Suoma Sámedikki várreságadoalli II, Heikki Paltto Ávvirii.

 

– ILO ja sámedikkeláhka gullaba oktii

Bloggačállosis mas ságadoalli Klemetti Näkkäläjärvi almmuhii ahte lea bivdán earu ságadoalli ja eará politihkalaš ámmáhiin Sámedikkis, čállá son maid ahte ii šat sáhte doarjut ILO-169 ratifiserema man riikkabeaivvit gieđahallat dán vahkkus.

 – Mun in sáhte dán dilis ávžžuhit, ahte Suopma ratifiserelii ILO 169-soahpamuša, daningo dat ii leat mu árvvuid ja dievasčoakkáma mearrádusaid mielde. ILO 169-soahpamuš ja sámediggelága ođasnuhttin leaba njađđojuvvon oktii maid ráđđehusa evttohusas ILO 169-soahpamuša ratifiserema várás. Jos Suopma ratifiserelii dál soahpamuša, de dat basalii gieđaidis ja sáhtálii riikkaidgaskasaš arenain rámpot iežaset earenoamásvuođa álgoálbmotvuoigatvuođaid ovddideamis ratifiseredettiinis soahpamuša, čállá Näkkäläjärvi bloggastis.

 

Oaidná vejolašvuođaid

Vaikke Heikki Paltto ge lea garrasit behtton, de son dattege oaidná buriid ILO-169 ratifiseremis.

 – Mu mielas gal dat livčče buorre ja nanosmahtášii sámiid sajádaga Suomas. Mun gal oainnán ahte dat buvttášii midjiide buoret vejolašvuođaid oaivvilda Paltto.

 

Giitá Näkkäläjärvi

Palttoi vuhtto maid čuohcan dat go ságadoalli lea bivdán beassat luohpat.

 – Klemetti lei ovdal muitalan munnje ahte soaitá luohpat, muhto ikte muitalii ahte lea mearridan. Dát lei sutnje váibmoášši mainna lea garrasit bargan golbma jagi ja atnán olu návccaid. Go de ii lihkostuva de sus dieđusge nohket návccat, čilge Paltto.

Paltto sákka háliida giitit ságadoalli.

 – Son lea dahkan buori barggu ja mii fertet giitit su dan barggu ovddas maid lea dahkan sápmelaččaid ovddas.

 

– Vearrámus dáhpáhus

Go riikkabeaivi hilggui ođđa sámediggeláhkaárvalusa de vuoigatvuođaministtar Anna-Maja Henriksson Ruoŧa Álbmotbellodagas (RÁB), mearridii geassit olles árvalusa eret riikkabeivviin.

– Mun ferten geassit olles láhkaevttohusa ruovttoluotta. Lean hui behtton dasa, ahte dat mii ráđđehusbellodagaiguin lei sohppojuvvon ovttas sámedikkiin, ii doallan. Dát lea hui váidalahtti ja vearrámus mii lea dán ráđđehussii dáhpáhuvvan, dajai son Yle:i.

 

–Dagai riekta

Paltto mielas dagai Henriksson riekta.

 – Go sápmelašmeroštallanášši ii mannan nu mo galggai, de lei buoret geassit árvalusa. Sámediggeláhka bissu dál nu mo lea, dat lea váidalahtti go ođđa árvalusas livččejit leamašan olu ođasmahttimat, oaivvilda Paltto guhte dál lohká vuordimin mo ILO-169 ratifiseren ovdána. Son ii loga duostat einnostit bohtosiid.

 – Balat go seamma bohtosiid boahtit go sámedikkeláhkaáššis?

 – In dieđe dadjat diesa maidege, ferte oaidnit loahppa vahkkus mo dat manná, dadjá Paltto.

 

-Almmuhus-