Ákšofallehuvvon olmmoš ii leat heaggaváralaččat roasmmehuvvan.
Guđátlot-jahkásaš dievdu, gii ákšuin fallehuvvui Anárjogas, lea dál joavdan Davvi-Norgga universitehtabuohccivissui UNN:i Romsii.
Bahuid roasmmehuvvan, muhto stabiila
Davvi-Norgga universitehtabuohcciviesu gulahallanráđđeaddi, Jan Fredrik Frantzen, duođašta ahte pasieanta lea ollen ja lea divššus.
– Dievdu lea bahuid roasmmehuvvan, muhto lea stabiila, dadjá Frantzen.
Man bahuid, lea go čuohpaduvvon dahje eambbo dieđuid ii sáhte Frantzen vel almmuhit.
– Son lea hui bahuid roasmmehuvvan, muhto in sáhte dađi eambbo almmuhit makkár divššus son lea, muhto ii leat heaggaváralaš, dadjá son.
Politiijat ožžo bearjadat iđit diibmu 07.30 dieđu ahte lea dáhpáhuvvan roavva veahkaválddálašvuohta Anárjoga guovllus Kárášjogas.
Dáhpáhus lei muhtin astoáigebarttas guovllus, gos muhtin viđátlot-jahkásaš dievdu navdo leat fallehan nuppi sullii seamma ahkásaš dievddu ákšuin.
Politiijat leat ain dutkamin ášši, ja rihkusteknihkkárat leat maid jođus báikái.
