Dutki oaivvilda ahte leat unnimusat golbma siva manne mánáin ja nuorain ráigánit bánit.
Statisthkalaš guovddášdoaimmahaga logut 2021 rájes čájehit ahte measta 70 proseantta mánáin ja nuorain vásihit unnimusat ovtta ráiggi bániin ovdal go devdet 18 jagi. Dutki ja bátnedoavttir Frode Staxrud lohká váttisin garvit ráiggiid bániin go lea nuorra. Dasa leat máŋga siva, čilge son.
– Nuorran leat bánit ođđasat ja nu maid rašibut ja lea stuorát várra ahte bánit ráigánit. Maŋŋel go devdet 20 jagi, de unnu dát váttisvuohta, dadjá Saxrud forskning.no:i.
Máttabánit bávččagit
Dutki čilge ahte nuorra emállja ii leat láddan iige gierdda baktearaid liikká bures go rávisolbmo emállja. Bánit ja emállja nanosmuvvet dađistaga go olmmoš rávásmuvvá ja dađistaga nagoda emállja vuostáiváldit eambbo fluora bátnevuoidasis.
Maiddái dat ahte muhtun mánáin ja nuorain lea váttis geallat máttabániid dahká ahte bániin sáhttet ráiggit šaddat.
– Sáhttá hui bávččas leahkit go máttabánit ihtigohtet ja nu sáhttá maid eambbo bávččagit go daid geallá, čilge son.
Dehálaš vuoruhit
Goalmmát sivva manne mánáin ja nuorain ráigánit dávjjit bánit lea go nuorat eai vuorut bániid geallat.
– Lea nu ollu eará maid nuorat galget ollet iđđes bargat, ja eahkes sii soitet váiban ja de eai soaitte vuoruhit bániid geallat. Leat máŋga siva mat bohtet oktanaga ja manne bánit ráigánit. Danne lea dehálaš muitit ja álot vuoruhit bániid geallat, dadjá dutki.
