-Almmuhus-
OĐĐASAT – Ii leat dušše politiijaid bargu fuobmát rohcošemiid

– Ii leat dušše politiijaid bargu fuobmát rohcošemiid

-

-

Dark Room dutkan čájeha man viidát ja fasttit neahttarohcošeamit sáhttet leat mánáid vuostá. Redd Barna ballá ahte dat lea dušše unna oasáš mii boahtá albmosii.

– Seksuála rohcošeamit mánáid vuostá neahtas leat hirbmat viidát. Lea hirbmat váttis hástalus hehttet rohcošemiid dáhpáhuvvamis. Dan dihte eat sáhte mii vuordit ahte dušše politiijat galget fuobmát rohcošemiid, muitala Kaja Hegg NTB:i. Son lea Redd Barna ráđđeaddi rohcošanáššiin mánáid vuostá neahtas.

 

Rájiid sirdet fierpmádagas

Redd Barna lohká dehálažžan ahte skuvllat, mánáidgárddit ja eará mánáiddoaimmahusat leat gergosat plánaiguin ja rutiinnaiguin vai dihtet maid galget dahkat go vuorjašuvvet máná dihte.

– Váhnemat, mánát ja rávisolbmot fertejit diehtit vára neahttarohcošeamis. Rohcošanmateriálaid neahtas ii leat álki oaidnit man ollu leat, muitala Hegg.

Giddejuvvon ja anonyma pedofiilaneahttabáikkiin maid Dark Room dutkan lea gávdnan, luitojuvvojit rájit das maid rohcošeaddji áigu dahkat mánáid vuostá.

– Dáin neahttafierpmádagain dahket sii dábálažžan rohcošit mánáiguin. Doppe lea rohcošeapmi dat mii lea normála, ja doppe ávžžuhit nubbi nuppi bargat rohcošemiid ja juohkit daguid govaid. Rájiid sirdet, ja doppe eai leat hettehusat, muitala Kaja Hegg.

 

Jođánit gávdnat daid mánáid

Son deattuha ahte mánát, geat gusket operašuvdna Dark Roomii, fertejit jođáneamos lági mielde identifiserejuvvot, vai besset eret rohcošandilis ja ožžot veahki. Dat 51 ášši maid dán rádjái leat gávdnan, galget leat miehtá riikka.

– Go lea dárbu hupmat mánáiguin geat leat identifiserejuvvon, ferte dáhpáhuvvat Mánáidviesus. Doppe leat vuđolaš rutiinnat movt čađahit jearahallamiid, muitala Stáhta Mánáidviesu jođiheaddji Romssas Ståle Luther.


Romssa Mánáidviesu jođiheaddji, Ståle Luther, čilge movt Mánáidviessu ráhkkana mánáid jearahallamiidda.
Govven: Jan-Morten Bjørnbakk / NTB Scanpix

Ráhkkanit bures

Luther muitala maid ahte juohke jearahallamii leat bures ráhkkanan. Doppe lea ráđđeaddi ja psykologa, ovttas mánáiddoaktáriin, politiijain ja mánáidsuodjalusain jus sii leat mielde áššis.

– Mii veahkehit nu ahte sii geat fuolahit mánáid mánáidviesu, galget ovdalgihtii oažžut vuđolaš dieđuid dan birra mii galgá dáhpáhuvvat. Dákkár áššiin ii galgga nu ollu ovdal go mánnái addo advokáhtta gii galgá leat mielde álggu rájes, muitala Luther NTBii.

Redd Barna lea ilus go leat 11 stádalaš mánáidviesu ja go doibmet mánáid váste báikin gos sáhttet dutkat rohcošanáššiid mánáid vuostá.

– Mii ballat ahte Mánáidviesuid kapasitehta sáhttá leat molsašuddi. Mii leat maid ovdal dokumenteren ahte gelbbolašvuohta lea molsašuddi go lea sáhka neahttarohcošeamis, muitala Kaja Hegg. (©NTB)

- Advertisement -
-Almmuhus-