– Ii leat čájehan makkárge beroštumi

– Šállošemiin gávnnahan ahte ođđa eanadoalloministtar ii leat čájehan makkárge beroštumi dasa ahte deaivvadit ii Sámedikkiin ii ge boazodoaluin iežas bargamušaid oktavuođas dán rádjai, dadjá Muotka gii oaivvilda ahte dát lea hirpmástuhtti.

– Sáhttá eahpitkeahttá dadjat ahte ii leat ásahuvvon mihkkege buriid oktavuođaid gaskal ministara ja min. Man diliheapme lea son duođai, go ii leat čájehan makkárge beroštumi dasa ahte deaivvadit Sámedikkiin dan rájes go son álggii gitta dássážii?

–Heajos vuođđu

Sámediggeráđđi Silje Karine Muotka válddii badjelasas ovddasvástádusa boazodoalu ođđajagimánus, ja juovlamánus namuhuvvui Jon Georg Dale ođđa eanadoalloministtarin ovddasvástádusain boazodoalus.

Sámediggi lea sávvan oažžut čoahkkima ođđa ministariin, ja Muotka lea váldán oktavuođa ministariin čađahan dihtii politihkalaš konsultašuvnnaid boazodoallolága § 60 rievdademiid oktavuođas, mas maid lea dahkkojuvvon mearrádus áššis Sámedikki dievasčoahkkimis.

– Dat go ministtar ii háliit dakkár čoahkkima, lea mu miela hui heajos vuođđu dan dárbbašlaš gulahallamii mii ministaris galgá leat Sámedikkiin. Ferte jearrat maid dat muitala, go ministtar galgá diehtit ahte Sámediggi dovddaha sápmelaččaid álbmotválljen dáhtu, dadjá Muotka.

Viđa geardde konsulteren

Eanadoallodepartemeantta rievdadusevttohus boazodoallo lága 60. paragráfii guoská boazologu geahpedeapmái Finnmárkkus, ja bearjadaga ovddiduvvui proposišuvdna stáhtaráđis áššis mas boahtá ovdan ahte ministtar lea hilgun politihkalaš konsultašuvnnaid sihke Sámedikkiin ja NBR:ain.

Proposišuvnnas čállá departemeantta ahte áššis leat čađahuvvon vihtta konsultašuvnna NBR:ain ja Sámedikkiin, ovdal go ášši sáddejuvvui gulaskuddamii, muhto ahte beliid gaskkas lea čađat leamaš guovtteoaivilvuohta áššis. Sámiid ovddasteaddjit leat earret eará ákkastallan ahte jus lágas galgá maidege rievdadit, de ferte láhka geahčaduvvot obbalaččat iige dušše ovtta paragráfa rievdadit.

– Eanet konsultašuvnnat eai lasit áššái šat maidege

Maŋŋil go ášši lei gulaskuddamis, de leat leamaš vel guokte konsultašuvnna dáid beliid gaskkas, Sámedikkiin konsulterejedje guovvamánu 23. beaivvi ja NBR:ain ges njukčamánu 10. beaivvi.

– Sihke Sámediggi ja NBR leat bivdán konsulterejuvvot politihkalaš dásis, muhto maŋŋil daid viiddis konsulteremiid mat dán rádjai leat čađahuvvon de oaivvilda ráđđehus ahte eanet konsultašuvnnat eai lasit áššái maidege, čállá departemeantta proposišuvnnas.

Stáhta ja stáhta gaskasaš konsultašuvdnašiehtadus galgá gokčat buot áššiid mat gusket sámi álbmogii, juoga maid Sámediggi oaivvilda ahte boazodoalloláhka áibbas čielgasit dahká.

Reagere maid konvenšuvnna ájiheapmái

Nubbi masa Muotka reagere garrasit, lea dat maid son oaivvilda lea mieđihahkesvuohtan Norgga ja Ruoŧa boazoguohtunkonvenšuvnna šiehtadallamiid oktavuođas.

– Norga ja Ruoŧa leat šiehtadallan boazoguohtunkonvenšuvnna birra 2005 rájes, ja dál bohtet dat ođđasat ahte ášši galgá čielggaduvvot viidáseappot Ruoŧa bealde. Mo hearrái sáhttá ministtar suovvat proseassa fas bisánit, go son berrešii diehtit man duođalaš ášši dat lea boazodollui ahte rádjaguovllut leat mielde šiehtadusas? Mun vuorddán ja gáibidan ahte ministtar váldá ovddasvástádusa dán áššis, ja ahte son doalaha dan ahte šiehtadallamat galget jotkojuvvot. Dát su láhtten sáhttá áddejuvvon dan láhkai ahte son hilgu iežas ovddasvástádusa, joatká Muotka.

Dáhttu Erna vástidit

Sámediggeráđđi Muotka gáibida dál ahte ášši boazoguohtunkonvenšuvnnain ovdána, ja oaivvilda ahte Stuorradiggi ferte diehtit ahte Sámediggi ii leat ožžon politihkalaš konsultašuvnnaid boazodoallolága rievdadusaid birra, vaikke vel lea ge áššis dahkkojuvvon dievasčoahkkinmearrádus Sámedikkis.

– Go Dale ies ii háliidan boahtit konsultašuvdnabeavdái boazodoallolága rievdadusaid birra, de gal ferte stáhtaministtar vástidit guorrasa go dát dan konsultašuvdnašiehtadussii maid son ieš vuolláičálii jagis 2005, loahpaha Muotka.

Olles proposišuvnna gávnnat dáppe.