-Almmuhus-
OĐĐASAT– Ii lean rasisttalaš jurdda

– Ii lean rasisttalaš jurdda

-

-

Son guhte heŋgii dán sismiesi šiltii, čilge iežas dahkan dan várohan dihte biilavuddjiid.  – Dárbbašmeahttun unohas, dadjet politiijat.

Dán sullasaš govva lea dán vahkkoloahpa viidát juhkkon facebook bokte ja boktán reakšuvnnaid sihke sápmelaččaid ja ruoŧŧelaččaid gaskkas.

 – Ledjen dušše duššástuvvan boazodoalli guhte in diehtán šat maid galgen dahkat go nu olu bohccot leat vuddjon dán geainnu alde, čilge Mattias Fjellström (21).

 

Suhtai

Fjellström gullá Norra-Vilhelmina čerrui Västerbottenis Ruoŧas. Sis lea eallu dán geaidnoguoras dálvvi ja son muitala olu bohccuid vuojahallat dákko.

 – Bearjadaga gávnnaimet čoavjjeha mii lei vuojahallon ja mas sismiessi lei girdán olggos čoavjjis. Mun de suhtten ja heŋgestin miesi dan šiltii mii vároha biillavuddjiide ahte guovllus leat bohccot. Jurdda lei fuomášuhttit biilavuddjiide ahte dákko leat bohccot, čilge nuorra boazodoalli.

 

– Buorre go boktá reakšuvnnaid

Son ieš maid govvii miesi ja almmuhii dan instagram bokte. Maŋŋil leat maid earát govven dan ja almmuhan facebooka bokte gova. Muhtin ruoŧŧelaččat leat reageren govvii ja gohčodit dán dagu unohassan. Sápmelaččat ges leat navdán dáččaid heŋgen miesi rasisttalaš ulbmiliiguin.

– Ovtta ládje lea buorre go govva lea boktán olu reakšuvnnaid, ammal de olbmot muitet vuolidit leavttu dán guovllus. Muhto lea suddu jus olbmot leat jáhkkán dán leamaš rasisttalaš dáhkkun go dat ii lean jurdda obage, čilge Fjellstrøm.

 

– Vudjet leavttus

Son muitala čearu boazodolliid dálve- ja giđđabotta viggat guođohit ealu vai bohccot eai vuojahalašii. Dákko gokko govva lea váldon lea 90 km/d leaktomearrin.

 – Biillat vudjet dákko nu leavttus ahte goasii ieža vel vuddjot. Duo go leimmet dan geaidnoguoras bargamin de oidnen biilla boahtimin ja viggen čuožžilit geainnu ala ja seavvit vai vuolidivčče leavttu, muhto dat baicce njurgugođii iige vuolidan gal, muitala son.

Fjellström ii loga jápma miesi heaŋgán šilttas eará go moadde diimmu mannan bearjadaga.

 

– Unohas

Västerbotten politiijaguovllu operašunjođiheaddji Tommy Nilsson, ii loga iežas gullan dán dáhpáhusa birra.

– Mun ádden ahte olbmot sáhttet jurddašit dán leat buorre vuohkin go áigot várohit biilavuddjiid, muhto geaidnoguoras han leat várohanšilttat jo. Politiijaid mielas ii gal leat dát buorre vuohkki, muhto baicce dárbbašmeahttun unohis vuohki, dadjá Nilsson.

 

Eai čuovvol

Nilsson dattege ii loga gal fuomášit lea go dát lobihis dáhkku.

 – In fuomáš maid galggašii leat rihkkon go sismiesi lea leamaš heŋgen, muhto ii leat buorre jus mat jurddaša sanitehtalaš beliid ja nuoskkideami dáfus. Muhto dat lea gitta das man guhká lea heaŋgán šilttas, čilge Nilsson.

Politiijat eai loga iežaset áigut čuovvolit ášši go jo miessi lea dolvojuvvon eret.

-Almmuhus-