Dievdu gii bážii iežas eamida ja su bártnáža Girkonjárggas borgemánus, ii lean heaigomielat ja sáhttá dubmehallat.
Dievdu gii bážii iežas eamida ja su bártnáža Girkonjárggas borgemánus, ii lean heaigomielat ja sáhttá dubmehallat.
Riektepsykiatriija leat árvvoštallan dievddu ja gávnnahan ahte son ii lean heaigomielat, ja boađus šattai almmolažžan go mannan bearjadaga bidje dievddu háldogiddagassii gávcci vahkkui, čállá iFinnmark.
Ii lean heaigomielat
59-jahkásaš dievdu bážii ja gottii iežas 37-jahkásaš eamida ja su 12-jahkásaš bártnáža Girkonjárggas borgemánu 29. beaivvi diibmá.
– Riektepsykiatriijalaš cealkámušas guovvamánu 7. beaivvi boahtá ovdan ahte áššáskuhtton dievdu ii lean heaigomielat, čállá riekti.
Mieđihan goddimiid
59-jahkásaš lea mieđihan goddimiid, muhto ii leat mearridan dohkkeha go ráŋggáštussivaheami, čállá iFinnmark.
Bearjadaga ovdal goddima, de lei 37-jahkásaš fitnan suohkana heahteguovddážis go son áiggui guođđit iežas isida, ja son galggai fárret heahteguovddážii disdaga.
Politiijat dutkojuvvojedje
Politiijat ožžo cuiggodeami go eai ipmirdan man duođalaš ášši lei, ja go eai lean geavahan geatnegahtton vugiid árvvoštallat veahkaválddálašvuođa (SARA). Dan bokte ledje sáhttit árvvoštallat nissona dili ja vára ášši ektui.
Politiijaáššiid earenoamášossodat heaittihii ášši go eai gávdnan čielga duođaštusa ahte politiija bargit dahje politiijaguovlu leat rihkkon maidege áššis.
Geassemánu 12. beaivvi dán jagi álggahuvvo diggi dievddu vuostá. (©NTB)
