-Almmuhus-
-Almmuhus-
KULTUVRAIi lean goassege jáhkkit ná fáhkka beassat Bukta lávddis čuojahit 

Ii lean goassege jáhkkit ná fáhkka beassat Bukta lávddis čuojahit 

-

-

– In lean goassege jáhkkit ná fáhkka beassat nie stuora lávddis čuojahit, lohká gitáračuojaheaddji Áslat Eira Álttájoavkkus «Not My Time To Die». Mannan vahkkoloahpa vuite sii musihkkagilvvus Romssas, ja besset seamma lávddis čuojahit go eará stuora musihkkanamat.

Ledje 14 joavkku mat ledje mielde Bukta Battle gilvvus mii vuohččan lágiduvvui Romssa ja Finnmárkku nuorabut musihkkáriidda.

Finálas ledje vihtta joavkku, ja loahpas ledje guokte joavkku mat vuite gilvvu.

Álttá joavku «Not My Time To Die» ja Romssa joavku «Ringo Moon» vuite Bukta Battle gilvvu.

 

Movttáskedje go vuite

Guovdageainnu bárdni Áslat Eira čuojaha gitára «Not My Time To Die» joavkkus.

Son muitala ahte lei hui suohtas go vuite gilvvu.

– Lei ártegis dovdu. In livčče goassege jáhkkán dan ja lei somás dovdu go vuittiimet. Lei somá oaidnit earáid mu joavkkus «dájáskeame» go vuittiimet, dadjá Eira ja bohkosa. 

«Not My Time To Die» joavku álggahuvvui Gilevuonas guhtta-čieža jagi áigi, ja leigga guokte vieljažaga álggos joavkkus.

Vieljašguovttes fárriiga Áltái, ja doppe de searvvaiga Marius Grøtte ja Áslat Eira jovkui.

Sii čuojahit punkalágan rockamusihka.

 

Bargagohtet skearruin

Sii vuite 10 000 ruvdnosaš stipeandda maid áigot geavahit skearrobuvttadeapmái.

Plána lea maid ahte dovddus ja hárjánan musihkkár galgá buvttadit skearru.

– Mii bargagoahtit maŋŋel beassážiid albmaládje skearruin.  Leat bargame oažžut «Biru baby» čuojaheaddji Ida Iki buvttadit dan skearru, lohká Áslat.

 

Seamma lávddis go stuorát artisttat

Vuoitu lea čuojahanáigi studios, musihkkavideo ráhkadit, bagadallama oažžut, 10 000 ruvdnosaš stipeanda, ja sii besset vel čuojahit stuora lávddis, Buktafestiválas.

– Lea hui stuora festivála ja leat stuora namat lávddis. Artisttat mat čuojahit. In livčče jáhkkán ahte nie fáhkka galggan beassat dieppe čuojahit. Dat lea hui ártegis dovdu, lohká Eira ja jurdila movt lei ovdal go fárrii Guovdageainnus.

– Máŋga jagi áigi ledjen ain Guovdageainnus, in ge lean goassege joavkkus čuojahan. Lea juohke diŋga geavvan hui johtilit. In mun leat beassan albma ládje reflekteret vuos, lohká Áslat. Dál illuda son čuojahit Buktas ovttas iežas joavkkuin «Not My Time To Die».

 

Rámidit nuorra musihkkáriid

Buktafestivála lágideaddji lea ilus go nu olu buorit joavkkut leat Romssas ja Finnmárkkus.

– Mii leat hirpmahuvvan go lea nu alla dássi dain nuorra čeahpes joavkkuin mat leat dán guovllus. Oktiibuot ledje 14 joavkku dieđihuvvon gilvui, ja dat orru boahtteáigái leamen buorre, čállá lágideaddji maŋŋel gilvvu.

Buktafestivála lágiduvvo suoidnemánu 18. beaivvis gitta 20. beaivái boahtte geasi, Romssas.

-Almmuhus-