Sápmi Awards gilvvut eai lágiduvvo dán jagi. Dál lea Johkamohkki ohcame eará lágideddjiid maŋit jahkái.
Johkamohki gielda lea lágidan Sápmi Award golbma jagi maŋŋálaga, muhto dál lea prošeakta nohkan. Dán jagi eai oba šatta ge doalut, muhto gielda lea dál gulaskuddame eai go maŋit jagi fas šattaše gilvvut.
Staare soaitá
Johkamohki gieldda ovdánahttinhoavda cealká Ruoŧa sámeradioi SR:ii ja SVT:ii ahte sii leat ohcame earáid geat válddáše badjelasaset lágideami.
– Dál leat mii ságastallame Staare gielddain, eai go sii lágidivčče Sápmi Awards 2016. Mii sávvat ahte gávdnat čovdosa mii dahká dan vejolažžan, čállá son dan guovtti ruoŧabeale sámi mediai.
Stuora vuoittut
2012 ledje Sápmi Awards gilvvut vuosttaš geardde, ja leat dan rájes lágiduvvon golbmii. Buoremus musihkkárat, boazobargit, duojárat ja biebmoráhkadeaddjit leat gilvalan juohke jagi čuođi duhát ruvdnosaš vuoittuid nalde.
Johkamohki gielda lea ovttas čearuiguin ja sámi servviiguin Johkamohkis lágidan doaluid. Johkamohki gielda, Norrbottena leanadiggi ja Norrbottena leanastivra leat máksán goluid. Eai leat dušše bálkkašumiid juohkán dáin stuora lágidemiin, muhto máŋgga beaivásaš doaluin leat maid lágidan earret eará njoarostangilvvuid ja miehtá Sámis leat boahtán artisttat dohko čuojahit.
