Ii jáhke Jensena rahpat ruhtaseahka dán jagi ge

Sámediggeráđđi lea dál loahpageahčen barggus hábmet Sámedikki 2017 bušeahta. Aili Keskitalo ballá ain unnit juolludemiid oažžut ráđđehusas Sámediggái ja eará sámi áššiide stáhtabušeahta bokte.

– Go Sámediggái ja eará sámi áššiide juolluduvvo unnit ruhta stáhtabušeahta bokte, de dat mearkkaša unnideami dain dehálaš sámi surggiin nu go oahpahusas, ealáhusovddideamis ja kulturdoaimmain. Mii sáhttit danin šaddat vuoruhit nu ahte čuohcá olles Sámi servodahkii, lohká Keskitalo.

Váruha unnit ruđa sámi áššiide bušeahtas

– Mun bijan vuođđun ahte ráđđehus ipmirda váikkuhusaid iežas politihkas, ja ahte bušeahttačuohppan ja láivudeapmi sámi servodagas lea sávvojuvvon ja háliiduvvon politihkka, joatká Keskitalo.

Stáhtabušeahta rámmat leat lassánan sullii 5 % jahkásaččat. Aŋkke lea 2014 rájes duohtavuođas niedjan juolludeapmi sámi áššiide. Jus galgat beassat seamma bušeahttadássái go leimmet 2014:s, de lea Sámedikkis dárbu 29,5 miljovnna lassi ruhtii. 46,3 miljovnna lassi juolludeapmi 2017:i lea dárbbašlaš jus Sámedikki bušeahtas galgá leat seamma ovdáneapmi go eará áššiin stáhtabušeahtas seamma áigodagas, čállá Sámediggi preassadieđáhusas.

Sámediggi seamma dásis go eará orgánat

– Mii leat guhkit áiggi geahččalan oažžut ovddasvástideaddji gulahallama ráđđehusain Sámedikki ja sámi servodaga ekonomalaš rámmaid birra. Mun sávan ahte Stuoradiggi dán čavčča áigu váikkuhit dasa ahte ásahit einnostahtti modeallaid movt ruhtadit sámi servodaga, mas Sámediggi meannuduvvo seamma dásis go eará almmolaš válljejuvvon orgánat riikkas, loahpaha sámediggeráđđi Ann-Mari Thomassen.

Čielggadeame ruhtadanmodealla

Gieldda- ja ođasmahttindepartemeanta bargá siskkáldasat čielggadit ruhtadanmodealla Sámediggái ja eará sámi áššiide. Čielggadeami sisdoallu ja almmuheapmi ii leat vuos almmuhuvvon.

Ráđđehus geige iežas 2017 stáhtabušeahttaevttohusa golggotmánu 6. beaivvi.

Sámediggeráđđi ovddida iežas sámediggebušeahttaevttohusa Sámediggái golggotmánu 24. beaivvi.