Stuoradiggepolitihkkár Frank Bakke Jensen ii hálit beare ollu váikkuhanfámu addit Sámediggái guolástanpolitihkas.
Stuoradiggepolitihkkár Frank Bakke Jensen ii hálit beare ollu váikkuhanfámu addit Sámediggái guolástanpolitihkas.
– Sámedikkis ii leat doaibmi rolla čađahit guolástuspolitihka. Lea ráđđehus Stuoradikki válddiin mii dan dahká. Sámediggi lea ráđđeaddi orgána sámi historjjá, giela ja kultuvrra ektui, lohká son NRK:i.
Olgešbellodaga guolástuspolitihkalaš ságadoalli Stuoradikkis Frank Bakke Jensen ii liiko go gohčoduvvojit mearrasámi guolástanriektin ja mearrasámi guovlun.
– In dieđe makkár mearrasápmelaččas leat historjjálaš rievttit, muhto sáhtán dadjat ahte vuotnaássit galget bargat guolástemiin ja árvvuin. In ge oainne ahte mearrasámit leat massán rivttiid go leat mearrasámit, lohká son.
Guolásteaddji suhttan
Nils Einar Mathisen (77) lea mearrasápmelaš Unjárggas eret. Veterána lea bivdán Várjjatvuonas olles iežas eallima ja suhttá go gullá maid Bakke-Jensen lohká.
– Mun suhtan garrasit ja lea unohas gullat dan maid son lohká. Son badjelgeahččá min dakkár vugiin ahte doaivvun son ii hálit mii galgat oba gávdnot ge, lohkan Mathisen.
– Jus ii livčče leamaš Sámediggi, de eai livčče mis leamaš guollefatnasat Unjárggas ja Várjjatvuonas. Bakke-Jensen ii ábut leat nu utnoheapme. Guolástansearvi lea sihkkarastán ahte guolásteaddjit besset bivdit vuonain.
«Helga-earri»
Guolásteaddjit geat orrot sámi báikkiin lea earri man ollu ožžot oaggut. Dát ásahuvvui go Helga Pedersen lei guolástusministtar ja gohčoduvvo vel «Helga-earrin». Olgešbellodaga guolástuspolitihkalaš ságadoalli Stuoradikkis ii liiko dán ortnegii.
– Mus lea váttisvuohta ipmirdit manne guollebivdis Deanus galget leat historjjálaš rievttit ja nannoset čanastagat guolástanrivttiide go nuppi bivdis Báhcavuonas, dadjá Frank Bakke Jensen NRK:i.
– Guhkes árbevierut
Ájluoktalaš Lars Filip Paulsen ii liiko iežas bellodatustiba cealkámušaide. Paulsen lea Olgešbellodaga sámediggelahttu.
– Sámi kultuvrras leat guhkes árbevierut guolásteamis sámi guovlluin. Lea áddetmeahttun ahte mii galggašeimmet garvit guolástanpolitihka, lohká son NRK:i.
Ii vástit njuolgut
Guolástusministtar Elisabeth Aspaker ii vástit njuolgut doarju go Frank Bakke-Jensena cealkámušaid. Son vástida:
– Mii leat geatnegahtton gulahallat Sámedikkiin, ja oainnán ahte mii sáhttit gávdnát soahpamušaid.
Ráđđelahttu hirpmahuvvan
Sámedikki ráđđelahttu Silje Karine Muotkas lea ovddasvástádus guolástangažaldagaide Sámediggeráđis. Son lea hirpmahuvvan go Bakke-Jensen ii liiko vuotnaeriide.
–Vuotnaguolástanearri gullá olles Finnmárkui ja buot fatnasiidda rabas joavkkus. Lea ártet go stuoradiggeáirras Finnmárkkus eret gii ii hálit dán eari, lohká son.
Sámedikki ráđđelahttu čujuha vel ahte stuorimus oassi Stuoradikkis dorjot dálá sámepolitihka.
– Dat guoská Bakke-Jensena bellodahkii maid, lohká Muotka.
