Kárášjoga sierravuodjenlohpelávdegotti jođiheaddji Olav Sara Nikkinena (Bargiidbellodat) mielas ii su lávdegoddi meannut olbmuid vuoiggalaččat.
Kárášjoga sierravuodjenlohpelávdegotti jođiheaddji Olav Sara Nikkinena (Bargiidbellodat) mielas ii su lávdegoddi meannut olbmuid vuoiggalaččat.
Kárášjogas begget dál heajos áššit mot sierravuodjinlobit addojit. Muhtumat ožžot ja earáide eai addo. Earret eará lea Kárášjoga sátnejođiheaddjái Svein Atle Sombyi addon njealji jahkái sierravuodjinlohpi. Maiddái dispalávdegottelahttui Gunn Anette Anti Aslaksenii lea addon njealji jahkái Rávdojávrriide geasehit biergasiid guolasteami olis.
Eahpevuoiggalašvuohta
Kárášjoga sierravuodjenlohpelávdegotti jođiheaddji, Olav Sara Nikkinen, ii leat leamaš mielde meannudeame daid áššiid, muhto son oaidná mearrádusain stuorra váttisvuođaid.
– Orru leamen muhtin áššiin ahte muhtin dispalávdegotti miellahtut mearridit alcceseaset buorrin. Dan oainnán ovttatmano. Mu mielas lea diet eahpevuoiggalašvuohta, go doppe ii gávdno vuoiggalašvuohta. Mun gal duosttan dan čuoččuhit ja nagodan dan noađi guoddit. Mun han dušše muitalan manlágan dilli mis lea. Lea bággu čorget. Váttisvuođaid galgá čoavdit, beaškala Olav Sara Nikkinen.
Čorgegoahtit
Sara Nikkinen ii ge loga sáhttit kommenteret «Rávdojávrriid-ášši» vuđoleappot, go dat dispaáššit leat váidon. Sara Nikkinen aŋkke sáhttá obbalašvuođas dadjat ahte dál lea áigi čorget mot sierravuoddjinlobit addojit Kárášjogas. Son lohká ge ahte dát lávdegoddi ii leat doaibman albma láhkái maŋemus nuppelohkái jagis, go olbmuid meannudit iešguđet láhkái.
– Doppe gávdnojit maid ovdamearkkat go ealgabivdiid ohcamiid leat meannudan iešguđet láhkái. Ealgabivdu han lea dainna lágiin ahte bivdoguovlluide lotnahuvvet bivdojoavkkut jagis jahkái. De lea geavvan dainna lágiin ahte jagi ovdal lea muhtun bivdojoavku ožžon lobi vuodjit gokko ledje ohcan, muhto go nuppe jagi lea ohcan eará bivdojoavku vuodjenlobi seamma sajis, de lea biehttaluvvon. Dainna lágiin eat sáhte áššiid meannudit, nu ahte dál fertet čorget sierravuodjenlohpelávdegotti, dadjá Sara Nikkinen.
Rievdadit
Olav Sara Nikkinen lohká ge iežaset Bargiidbellodagas bidjan juo johtui čorgenproseassaid ja son lea juo gulahallan Finnmárkku Fylkkamánniin mot galgá meannudit dispaohcamiid.
– Lea áibbas čielggas ahte sierravuodjenlohpelávdegoddi rievdaduvvo áibbas eará láhkái, go dáinna lágiin ii sáhte joatkit. Dan lea bággu njulget ja čorget, dadjá Olav Sara Nikkinen.
