Johttisápmelaččaid Listtu vuosttaševttohas Berit Marie E. Eira ii vel illut ovdal go buot bohtosat čilget. Sis lea doaivva oažžut guokte áirasa Sámediggái.
Johttisápmelaččaid Listtu vuosttaševttohas Berit Marie E. Eira ii vel illut ovdal go buot bohtosat čilget. Sis lea doaivva oažžut guokte áirasa Sámediggái.
Johttisápmelaččaid Listtus (JSL) lea doaivva oažžut guokte áirasa Sámediggái. Maŋemuš válggas oaččui JSL eanaš jienaid Guovdageainnus.
Listonjunuš Berit Marie E. Eira jáhkká dál oažžut eambbo jienaid Kárášjogas.
– Dál mis lea nubbievttohas kárášjohkalaš man maŋemuš válggas ohcaledje, lohká Eira Eira.
Nubbievttohassan lea Anders Somby jr.
Ii vuos illut ii ge jierásnuva
Go 53 proseantta jienain leat lohkkon, de lea JSL ožžon 2,1 proseantta jienain.
Berit Marie E. Eira lea vuos duhtavaš bohtosiiguin mat čájehuvvojit.
– Dál ii dieđe vel mat leat lohkkon. Gaskaboddosaš bohtosat leat buorit, maŋemuš válggas ledje 3,3 proseantta jienat. Dál eai leat vuos visot čielgan, lohká Berit Marie. Son lohká ahte šaddá gelddolaš idja, ja ii duostta vuos jierásnuvvat ii ge illudit, muhto vuordit loahpalaš bohtosiid.
Leamaš balus
– Jáhkát go beassat Sámediggái?
– Gal dál almma beasan Sámediggái, reašká Berit Marie.
Son muitala ahte lea leamaš veaháš balus movt galgá mannat giččuin, go lea vuosttaš háve njunuševttohassan.
– Lean leamaš balus movt váldet vuostá, go lean nissonolmmoš, ja šaddá dego Wirkola maŋŋái njuiket, lohká son.
Dál lea ge vuosttaš háve go Ovlin-Biera, Per A. Bæhr, ii leat njunušin JSL listtus.
