Sámediggepresideanta Vibeke Larsen ii dohkket dan sohkabealevealaheami man skiipahoavda Sandra Andersen Eira lea vásihan.
Sámediggepresideanta Vibeke Larsen ii dohkket dan sohkabealevealaheami man skiipahoavda Sandra Andersen Eira lea vásihan.
– Mun in dohkket buot daid negatiiva guottuid mat čuhcet nissonolbmuide ámmáha oktavuođas, go dat sáhttá baldit nissonolbmuid válljemis dakkár fidnu main barget eanaš almmáiolbmot, dadjá Larsen preassadieđáhusas.
Nuorra nisu vealahuvvui
Skábmamánus mannan jagi mearridii Sandra Andersen Eira, gii lea eret Leaibevuonas Finnmárkkus, oastit sierra šárkka ja virgádit alccesis fanasveaga. Dan rájes lea vealaheapmi lassánan, son lea muitalan.
Eira muitalii vahkkoloahpa fanasvuvdiid birra geat hállet sutnje mánágielain, ja dáhkádussearvvit mat hilgot su. Son lea ferten gillát vealaheami danne go son lea nuorra nisu gii eaiggáduššá fatnasa.
Unnán nissonolbmot guolásteamis
2016:s ledje 273 nissona guolásteaddjin oktiibuot 9138 guolásteaddjis geain lea guolásteapmi váldofidnun Norggas. Dat mearkkaša golbma proseantta. Finnmárkkus ledje jagi 2016 5 proseantta nissona guolásteaddjin.
Go buohtastahttá boazodoalu siidaoasseeaiggádiiguin, de doppe leat 13 proseantta nissonat. SED-guovllus leat 28,6 proseantta nissonat geain lea eanadoallu váldofidnun.
– Logut čájehit ahte vuođđoealáhusain lea dássedeattohisvuohta sohkabeali dáfus, ja danne mii fertet buohkat doarjut nissonolbmuid geat válljejit dákkár fidnuid ja geat dustet dieđihit heajos guottuid birra, dadjá Larsen.
