Finnmárkku Bargiidbellodat áigu cakkadit Finnmárkkuopmodaga vuovdimis eret ossosiid Finnmark Kraft elfápmofitnodagas.
Finnmárkku Bargiidbellodaga jođiheaddji Kristina Hansen čállá preassadieđáhusas ahte sii vuosttaldit Finnmárkkuopmodaga (FeFo) mearrádusa vuovdit eret iežaset ossosiid Finnmark Kraft AS elfápmofitnodagas.
– Finnmark Kraft lea mielde sihkkarastime Finnmárkui ja finnmárkulaččaide iežamet čáziid ja eatnamiid, eaiggáduššama ja árvoháhkama dain. Mii Finnmárkku Bargiidbellodagas áigut álo jođihit politihka mii sihkkarastá dan, čállá son.
Hehtten internašunála fitnodagaid
Son lohká ahte livččii hui dehálaš bisuhit eaiggáduššama Finnmárkkus, go hálddašeapmi, árvoháhkan ja vuoitu das, lea mielde hábmeme Finnmárkku ovdánanvejolašvuođaid.
Hansen lohká sin hui duhtavažžan leamaš go FeFo ovdal lea geahččalan čohkket elfápmofitnodagaid Finnmárkui. Son lohká FeFo nu lea leamaš mielde ásaheame fitnodagaid main lea ekonomiija ja fágalaš gelbbolašvuohta ieža háhkat bieggafámu.
– Nu dat hehttejedje stuora nášunála ja internášunála fitnodagaid oažžumis huksenlobiid min bivnnuhis bieggamilloguovlluide, eai ge beassan bággolonistit ja váldit vuoittu olggos fylkkas. Danne mii áigut dál geahččalit bissehit FeFo vuovdimis iežaset eret Finnmark Kraft AS:s dadjá Hansen.
