-Almmuhus-
-Almmuhus-
KULTUVRAIi diehtán gii su lei evttohan mielde

Ii diehtán gii su lei evttohan mielde

-

-

Dan rájes go KEiiNO joavkku lávllačálli ja lávlu gávnnai Fred René Buljo, de leat miehtebiekkas borjjastan. Juoigi ieš ii diehtán juste gii lei su evttohan dasa mielde, go son gii vuosttažin jerrui ii háliidan searvat MGP lávlagii.

Mannan čavčča lei Tom Hugo Hermansen čállime lávlaga ovttas iežas irggiin, mainna leigga pláneme searvat Melodi Grand Prix gilvui 2019:s.

 – Moai leimme jo gávdnan Alexandra Rotana lávlut lávlaga ja jurddašeimme sámi ráppára birra gii sáhttá leat mielde lávlagis, čilge Hermansen.

 

Ohcame sámi ráppára

Soai leigga veahá darvánan lávllabuvttademiin, ja leigga hutkame ođđa ideaid.

– Mun riŋgejin SlinCrazii, ja jerren sus searvat lávlagii man ledjen ráhkadeame, muhto son ii lean beare mielas searvat, lohká Hermansen. 

– SlinCraze attii munnje Duolva Duottar -joavkku Fred René Buljo nama, ja ávžžuhii sus jearrat searvat dan lávlagii. Nu mun de dahken, ja sáddejin dieđu Buljoi jearran dihte searvá go, lohká son.

 

Ribahii sáddet suhtus smiley

Fred René Buljo lei olgun viehkame, ja oinnii ahte lei ožžon dieđu telefovdnii. Son rabistii dieđu, muhto ii vástidan dan.

– Munnje bođii dušše nárrohaddan «smiley» govva, lohká Hermansen. («Smiley» leat ámadaju govažat mat muitalit mot olmmoš dovdá ja jurddaša).

Dat nárrohaddanámadadju ii galgan sáddejuvvot, ja Buljo lei dušše ribahan guoskkehit dan boallui telefovnnas. Maŋŋel go son ollii ruoktot, de vástidii dieđu.

– Mu mielas lei hui fiinna jurdda dan lávlagis masa mun maid liikojin, muitala Fred René.

Lávlla lea dan birra go olbmot leat iešguđetláganat ja háliidit heivet servvodahkii, leažžá dal homofiila dahje sápmelaš.

 

Ráppas luohtái

Sii eai lean deaivvadan nubbi nuppiin, ja dolle oktavuođa, ja sáddejedje jietnafiillaid nubbi nubbái neahta bokte. Easka go áigemearri lahkonii, de deaivvadedje vuohččan studios Oslos.

Juovlamánu 6. beaivvi bargagohte studios lávlagiin. Sis ii lean olu áigi bargat dainna ja galge geargat juovlamánu 10. beaivvi rádjái go áigemearri dieđihit mielde MGP gilvui lei dalle.

– Jurdda lei ahte Fred René galggai rappet sámegillii, muhto fuomášuvvui studios ahte šattai oalle stuora seaguhussan ja ahte luohti heive buorebut lávlagii. Nu de fertii Fred René ráhkadit sierra juoiganoasi lávlagii, oalle jođánit, čilge Hermansen.

 

Nanu báttit ja ođđa olmmáivuohta

Olmmáivuohta stuorui hui jođánit dan rájes go bargagohte ovttas.

– Mii leat oanehis áiggis šaddan oahpásmuvvat ja dovdat nubbi nuppi, go leat ovttas vásihan vuoitit MGP, de das lea boađus ahte šaddet nanu báttit min gaskkas, lohká Buljo.

 

Movt du mielas din kvalitehtat heivejit oktii?

– Mii leat čoavdán dan bures, muhto dat lea dušše dát okta lávlla vuos dál. Mis leat eará kvalitehtat maid. Mun lean rappar, ja Alexandras ja Tom Hugos maid eará vuogit lávlut, ja dat lea hui somá oaidnit movt dat šaddá. Mii leat jo ráhkadišgoahtán eará lávlagiid dál, lohká son.

 

Luodda šaddá dađistaga dál ja buot manná hui jođánit. 

– Álggos lea váldomihttu promoteret «Spirit in the sky» lávlaga ja mátkkoštit vehá Eurohpás. Bearjadaga leimmet čuojaheame Melodifestivalena oktavuođas Stockholmas, lohká Buljo.

 

Leat ain hui movttegat maŋŋel vuoittu

Dis leat buot mannan hirbmat njuovžilit dán rádjái. Movt oainnát din boahtteáiggi?

– Juste dál orru boahtteáigi hui čuovgat. Mii leat hui movttegat go leat beassan viidáseappot, ja áigut dahkat buori barggu Eurovisionis ja buot návccaid bidjat oktii vai ráhkadit albma šovva, lohká Buljo.

Galggašii jáhkkit ahte sis lea stuora apparáhtta sin birra, muhto sii leat ieža bargan eanaš oasi dán rádjái. 

– Lávdešovva fertet dahkat ođđasit, go mun dovddan ahte min višuvnnat eai boahtán nu bures ovdan dán nummáris. Mis lea leamaš čoahkkin gos leat plánen movt promoteret KEiiNO, sámi kultuvrra ja movt čájehit eamiálbmotgielaid jagi mii lea dál, lohká son.

Gaskavahku šiehtadedje sii bookingfitnodagain, mii gohkke buot praktihkalaš beliid go galget čuojahanbargguid čađahit.

 

 

 

-Almmuhus-