Guokte nissona gižžádallaba beassat jođiheaddjin maŋŋel go Jelena Porsanger luohpá rektorin Sámi Allaskuvllas.
Sámi Allaskuvlla válgastivra duođašta NRK Sápmái ahte dálá rektor Jelena Porsanger ii dáhto joatkit doaimmastis.
– Mis leamaš válgastivračoahkkin ja leat gávnnahan ahte guokte teama háliidit ja leat dohkkehuvvon evttohussan, goappašat teamain leat dušše nissonolbmot, lohká válgastivrajođiheaddji Maren Palisma.
Eira vs. Guttorm
Dálá prorektor, guovdageaidnulaš Inger Marie Gaup Eira háliida rektorin Sámi Allaskuvlii. Jus son šaddá rektorin, de álgá Lisa Baal prorektorin. Nubbi rektorevttohas lea kárášjohkalaš Gunvor Guttorm. Jus son vuoitá gičču, de álgá Line Kalak prorektorin. NRK Sápmi lea geahččalan oažžut kommentára evttohuvvon rektoriin, muhto ii leat lihkostuvvan.
Gunvor Guttorm (gurut) ja Inger Marie Gaup Eira (olgeš) háliideaba jođihišgoahtit Sámi Allaskuvla. Rektorválga dáhpáhuvvá miessemánu 18. beaivvi. Govvamontáša ráhkaduvvon Ávvira vuorkágovaiguin.
Ii kommentere
48-jahkásaš Jelena Porsanger lea eret Guoládagas, Ruoššas. Son lea bargan Sámi Allaskuvllas 2010 rájes ja lea jođihan ásahusa 2011 rájes. Son ii dáhto rektorválljema kommenteret. Maŋimuš áiggiid leamaš Porsanger vuostebiekkas, go gieskat almmuhuvvui Stuoradikkedieđáhus mas eiseválddit moitet Sámi Allaskuvlla hálddahusa vuogádaga ja ruhtabearráigeahču.
Sámi Allaskuvlla ođđa rektor válljejuvvo miessemánu 18. beaivvi.
