Annbjørg Hætta ii beassan viidáseappot The Voice lávlungilvvus maid TV2 lágida.
- Vaikko dalle go dát filbmejuvvui ii orron dahkamin maidege go in beassan viidáseappot, de ferten mieđihit ahte lean maŋŋel jurdilan «–easj, go in beassan viidáseappot», lohká Annbjørg.
The Voice lea lávlungilvu man TV2 čájeha, dán gilvui lei sámenieida Annbjørg Hætta beassan mielde. Odne álge gilvvu duella-oasit, dáin galget guovttes ja guovttes gilvalit ja duopmárat dahje mentorat, de válljejit goabbá beassá viidásat.
Vuosttaš párra geat lávlluiga leigga ge Annbjørg Hætta Guovdageainnus eret ja Oda Gondrosen Fredrikstadas eret.
Lossat
Annbjørg Hætta lei jorgalan daid osiid maid ieš lávllui, sámegillii, ja vaikko oaččui rámi, de válljii mentor Oda Gondrosena mannat viidáseappot gilvvus.
– Juste dalle orui áibbas ortnegis go in mannan viidáseappot. Dát oassi mii odne čájehuvvui lea filbmejuvvon álggus njukčamánu, ja mun ledjen váibán. Lea olu bargu ja lossat mátkkoštit Guovdageainnus dohko searvat gilvui, ja go in mannan viidáseappot de orui dego lossa noađđi gahččamin mu olggiid alde eret, muitala Annbjørg bearjadateahket Ávvirii.
Dás oainnát go lávlluiga:
HØR DENNE!!! Fredag er det klart for dueller i The Voice – Norges beste stemme Vi kan garantere at du ikke har hørt “Hand in my Pocket” (Alanis Morisette) slik før….
Posted by TV 2 on 16. cuoŋománu 2015
– Easj, go in mannnan viidáseappot
Dál go lea mannan muhtun áigi dan rájes go dát filbmejuvvui, ja go lean TVs oaidnán daid eará gilvaleddjiid, de ferten gal lohkat ahte lean jurdilan «easj, go in beassan viidáseappot», boagusta Annbjørg gii lea ilus go searvvai gilvui.
– Mentor Hanne logai ahte mun lean juo artista doppe gos mun boađán, ja mun sávan ge mu oassálastin dagaha ahte olbmot olggobealde sámi maid fuobmájit sámi musihkka. Sámi musihkka leage dat mainna mun háliidan viidáseappot bargat.
