Vaikko Signe Marie Fidje Store ovddastii Norgga Olympiagilvvuin Rio de Janeiros, de ii leat son riikajoavkkus boahtte jagi.
Vaikko Signe Marie Fidje Store ovddastii Norgga Olympiagilvvuin Rio de Janeiros, de ii leat son riikajoavkkus boahtte jagi.
– In sáhte lohkat lean hirpmástuvvan, dat leat nie movt sii lávejit bargat, lohká Signe Marie Fidje Store iFinnmark aviisii.
Moaitán lihtu
Deanu nieida geažuha go son lea rahpasit moaitán lihtu, de lea dat dagahan ahte lea eret riikajoavkkus.
– Lean behtohallan go sii ieža leat gieđahallan ášši vuoiggameahttumiin ja eahpeáššálaččat. Lean viggan čilget mu áigodatplánaid, muhto sii beroštedje eanet ahte mun in galgga dadjat maidege mediai go in leat duhtavaš. Mun galggan vissa dušše modját ja nivkalit juohke diŋgii maid sii lohket, lohká Fidje Store iFinnmark aviisii.
Behtohallan ja hirpmástuvvan
Jođiheaddji Deanu heaibunsearvvis Ulf Børre Hansen lea sihke behtohallan ja hirpmástuvvan.
– Go geahččá maid Signe Marie lea olahan ja man ollu návccaid son lea bidjan šaddat vel buoret, de lea dát ipmirmeahttun. Mu oainnu mielde leat váldon heaibut geat eai leat seamma dásis go Fidje Store, lohká Hansen.
Son áigu ságastit searvvi hárjeheddjiin Frode Gundersenin.
– Mii fertet oaidnit maid dahkat, muhto ii leat eahpelunddolaš hupmat lihtuin, lohká son.
