Vaikke ievttá gilvvuin manai buorebut Joachim Olseniin, de son liikká ii olahan gitta loahppagilvvuide.
Vaikke ievttá gilvvuin manai buorebut Joachim Olseniin, de son liikká ii olahan gitta loahppagilvvuide.
Kárášjotgánda Joachim Olsen lea dál Amerihkás gilvaleamen, gos earret eará gilvala «Isoc nasjonal Amsoil snocross» skohtergilvvus. Son lea «Team Woodie’s Racing» proffajoavkkus mielde, gilvu leat «Canterbury Park Shakopee» báikkis, Minnesotas.
Rámida joavkku
Ievttá oassegilvvuin birgii bures. Vuosttaš oasis, dahje heatas, ollii njealjádin mollii. Olsen čállá iežas joavkku facebook-siiddus ahte lea hui duđavaš ievttá beivviin ja iežas joavkkuin.
– Sii barget erenoamáš buori barggu muinna ja skohteriiguin. Ja lea oalle buorre go lean 20 minuvtta ollen jo iskat skohtera dán rádjai, leaikkastallá vel ieš.
Loga maid: Lei njunnošis go gopmánii
Skohter ráigánii
Ikte ollii son njealjádin maiddái nuppi heatas, muhto ii beassan liikká njuolgga loahppagilvui. Son dattege beasai vuodjit «Last Chance Qualification» oasis, mas vihtta buoremusa besse loahppagilvvuide.
– Otne manai buorebut go álgobeaivvi, bohten njealjádin goappašat heatain. «Last chance» vuodjimis lei heajos álgu mus, ledjen daid eará skohteriid searvvis gos moivejin veaháš. Muohtasoicca siste in oaidnán maidege, guoskkehin eará skohteriidda ja mu skohter ráigánii ovddageahčen nu ahte dohko dievai muohta. Nu nogai leaktu ja ollejin gávccádin mollii, liikká lean duhtavaš, čálii Olsen maŋŋil gilvvuid.
Nu ollii Olsen ikte guhkelii gilvvus go maid álgobeaivvi dagai, dalle lei njunnošis go gopmánii skohteriin.
Odne galgá maid searvat gilvvuide, dat leat regionála gilvvut mat eai sáddejuvvo interneahta bokte. Olsen dattege lohpida muitalit mo gilvvuin manná iežas facebook-siiddu bokte.
