Servodatsihkarvuođa ja gearggusvuođa direktoráhtta lea mearridan ahte Nils Asllat Kildedam ii beasa joatkit Kárášjoga gieldda buollinhoavdan.
Nils Asllat Kildedam lea maŋimuš guokte jagi doaibman buollinhoavdan sierralobiin, muhto dát ii guhkiduvvo, cealká direktoráhtta Kárášjoga gieldda ohcamuššii.
Vuođđooahppu gáibádussan
Buollinhoavddas gáibiduvvo formálalaš vuođđooahppu, buollinteknalaš oahppu ja hárjáneapmi.
Servodatsihkarvuođa ja gearggusvuođa direktoráhtta ii guhkit sierralobi go buollinhoavddas Nils Asllat Kildedamas váilu gearggusvuođaoahpu goalmmát ceahkki ja buollinsuodjalusa eastadanfidnooahppu.
Gieldda ovddasvástádus
Direktoráhtta deattuha ahte lea gieldda ovddasvástádus ahte buollin- ja gádjunveagas lea dohkálaš gealbu.
Biehttaleamis čállet maiddái ahte ii leat dábálaš addit sierralobi jus lea sáhka váilevaš oahpus, ja dasa lassin lávejit addit eanemusat guokte jagi sierralobi, ja dán lean Kárášjoga gielda ožžon 2015-2017 áigodagas.
Direktoráhtta lea registreren ahte Kildedam lea ohcan Norgga buollinskuvlla kursii dán jagi, muhto dát ii leat doarvái ágga guhkidit sierralobi.
