– Monika lea dakkár olmmoš geas álo lea buorre mokta ja stuorra váibmu, čállá son guhte evttoha Monika árgabeaisáŋgárin.
Ávvir lea bivdán lohkkiid sáddet evttohusaid geaidda galggašii addot veaháš fuomášupmi ovdal juovllaid. Mii ohcat olbmo gii buktá moji ja ilu, juogo bargosajis dahje astoáiggis. Mii ozaimet árgabeaisáŋgáriid.
– Mun háliidivččen din gudnejahttit árgabeaisáŋgárin Monika Anti, gii bargá Sámi dáiddaguovddážis Kárášjogas. Monika lea dakkár olmmoš geas álo lea buorre mokta ja stuorra váibmu. Son váldá olbmuid álo ustitlaččat vuostá go suinna deaivvada, ja olmmoš duođaid dovdá ahte son oidnojuvvo, sihke bargguid olis ja muđuige, čállá evttoheaddji Kirsi Paltto.
– Monika lea guhká bargan Sámi dáiddaguovddážis iešguđetlágan dáiddačájáhusaiguin, ja lea hirbmat čeahppi váldit vuostá olbmuid ja fuolahit ahte buohkain lea buorre dilli. Son maid berošta sámegielas ja sámi árvvuin. Sávan su válljet árgabeaisáŋgárin, čállá evttoheaddji.
– Heaitte eret!
Go Ávvir váldá oktavuođa Monikain, de son illá jáhkká ahte leat rievttes olbmui čuojahan.
– Heaitte eret, čaimmiha son.
– Dát gal lei somá. Muhto diet han gal lea bargooktavuođas, mus han lea diekkár bargu mas ferte olbmuid váldit vuostá. Dáiddárat go bohtet ja nu ain, dadjá Anti.
Eai nu ollu doaimmat juovllaide
Monika muitala ahte juovlabasiide son láve čorget, sihke siste ja maid olgun. Son ii leat vuolgime gosage, dušše ráfis návddašit basiid ruovttus.
– Ii leat hušša juovllaide, eai ge leat nu ollu juovlaárbevierut maid láven bargat.
– Sávan juovllaide ráfi ja dearvvašvuođa, loahpaha son.
Juovlamánu geiget mii Ávviris juovlafuomášumi olbmuide geat ánssášit liigefuomášumi barggu ovddas maid dahket illun earáide. Cavgil midjiide gii ánssášivččii juovlafuomášumi. Čális e-poastta post@avvir.no. Čális oanehaččat manne juste dat olmmoš ánssášivččii juovlafuomášumi.
